Shillong, Naitung, 15: Ka Sorkar Jylla ka la rai ban pyntreikam ïa kawei ka sienjam ba thymmai ban wanrah ïa ka jingshngaiñ bad ka jingïada ïa ki nongleit nongwan ha kylleng ki bynta ka jylla.
Katkum kane, baroh ki trai kali kamai kin hap ban bud ïa ka jingbthah da kaba tah ïa ki jingtip kiba kongsan shaphang u nongñiah kali jong ki, kynthup ïa ki jingtip ba bniah jong ka laisen, u phone number bad ka jaka sah.
Ïa kane la pyntip da u nongaiktien ka Sorkar MDA u Bah Paul Lyngdoh uba long ruh u Myntri ka tnat Jngohkai Pyrthei hadien ba la wai ka jingïalang ba la pynïaid da u Symbud Myntri Rangbah ka Jylla uba khmih ïa ka tnat Transports u Bah Sniawbhalang Dhar.
Ka thong ba kongsan jong kane ka jingthmu ka long ban pynduna ïa ki kam runar ruser ba lah ban leh da kaba pyndonkam ïa ki kali kamai bad ban wnarah ïa ka jingsngew shngaiñ hapdeng ki nongleit jingleit. Da kaba tip mano ba niah ïa ki, ki nongleit nongwan kin sngew shngaiñ bad kham shngaiñ, la ong u Bah Paul haba kren sha ki lad pathai khubor.
U la bynrap ba kane ka kyndon kan treikam ïa baroh ki kali kamai ha kylleng ka jylla Meghalaya, kaba kynthup ïa ki kali kiba la ïoh ïa ki kot ki sla na ki ophis District Transport Officer (DTO) bapher bapher. Hynrei ka ym kynthup satia ïa ki kali jong ki riew shimet, ki kali Sorkar bad ki kali jong ki Corporation bad Undertaking.
Shisien ba la pynmih ïa ka jingpynbna, yn ai por shi bnai ïa ki trai kali kamai ban kohnguh ïa ka kyndon thymmai, u la ong da kaba bynrap ba ïa kane ka jingthmu la khmih lynti ba kan pynbha ïa ka jingïada ha ka jylla Meghalaya baroh kawei, khamtam eh ha kaba ïadei bad ka jingkiew na ka jingwan jong ki nongwan jngohkai pyrthei shapoh ka jylla.
