Shillong, Lber, 25: Ka Federation of Khasi Jaiñtia and Garo Peoples (FKJGP) West Jaiñtia Hills ha ka sngi Baar ka la pynrem jur ïa ka jingshah shoh pynmynsaw u Bah Aibandari Sumer ha ka 22 tarik mynta u bnai ha ka shnong Mukroh ha ki briew ba la kynnoh ba ki dei na ka jylla Assam.
Ka FKJGP ka la kyntu ïa ki bor jong ka aiñ ba ki dei ban shimkhia ban kem ïa kiba donkti bad ban pyntikna ruh ba kum kine ki jingjia kin ym jia shuh. Ka seng ka dawa ruh ïa ka Sorkar ba ka dei ban buh mardor ïa ka Border Out Post ha Mukroh khnang ba kan wanrah ïa ka jingshngaiñ jong ki paidbah ha ka thaiñ.
Kum ban shu pyntip, u samla Aibandari Sumer, 22 snem ka rta u la shah rah bor sha khlaw bad shah pynap suloi bad shah shoh shah dat ha ki lai ngut ki briew katba u dang don ha lynti ban leit sha lyngkha ha ka por 10.00 baje mynstep.
Ha ka ejahar ba la ujor ha u Officer In-Incharge Barato Outpost, la ong ba u samla Aibandari Sumer ryngkat bad u paralok u samla Riham Sumer ki dang thmu ban leit trei sha lyngkha kaba don ha Sanaro, Mukroh hynrei kyndit kynsan la wan mih lai ngut ki briew ha kaba uwei u la kam ïalade kum u Contractor uba pyntrei ïa ka jingpynkhyllem ïa ki dieng ha Salang, Mukroh, katba uwei u Pulit Assam bad uwei pat briew ki la rahbor ïa u samla Aibandari, katba u samla Riham u la shu lait phet da ka said.
Katkum ka ejahar, u samla Aibandari u la pyntip ba ki lai ngut ki briew ki la rahbor ïa u sha khlaw bad ki la teh la khum ïa ki kti jong u shadien da ka sopti ba u phong bad ki la pynap da ka suloi ïa u bad maham wat ban pynïap ïa u nalor ba ki la bom la tied ïa u haduh ba um tip briew shuh.
Ki lai ngut kiba ladep leh ïa kane ka kam ki la phet noh bad ynda kham katto katne por u Bah Aibandari u la ïohbor bad kyndit bynriew um shym la ïohi shuh ïa ki lai ngut ki briew bad u la ïohlad ban leit phai pat sha la ïing.
