Shillong, Naitung, 14: Ka Dorbar Shnong Madan bad Riat Laban ka la kyrpad ïa ki nongshong shnong ka Sor Shillong kiba don ïa ka mon babha ba kin ïarap kylluid mynsiem ïa ka longiing jong u Bah Khrawbor M. Mawñiuh bad ka Kong Tennycy Lyngdoh Nongpiur kiba la duh noh ïa ka ïing ka sem kaba la shah bamduh ha ki thylliej ding barhem kaba la jia ha ka sngi u Blei ha ka por kumba 1:30 baje noh sngi.
Kane iing jong kine ki shikurim kiba don lai ngut ki khun, ka dei kaba don mar syndah jong ka Raid Laban Secondary School namarba u Bah Khrawbor M. Mawñiuh u dei uba trei kum u Chowkidar jong kane ka skul.
Ha ka jingïakren bad ka Batesi Tv, u General Secretary jong ka shnong u Bah Rupert Green Marbaniang u la ïathuh ba KI para nongshong shnong tang shu ïoh ki la noh jingïarap katba lah ei sha kane ka longiing da ka bor pisa bad da ki tiar ba ka longiing ka donkam kyrkieh.
U MLA jong ka South Shillong Constituency u Bah Sanbor Shullai uba la don ha lynti ban leit ïashim bynta ha ka jinglehniam Behdieñkhlam ha Jowai, West Jaiñtia tang shu ïoh jingtip shaphang kane ka jingjia u la wan phai noh bad ban leit jngoh ïa kane ka longiing kaba la mad ha kane ka apot ba sngewsih namarba baroh ki jingdon jingem hapoh ka iing ki la shah bamduh lut ha ka ding kaba klang, la ïathuh u Bah Marbaniang.
Katkum ka jingïathuh jong u Bah Marbaniang, ki bor pynïaid jong ka Raid Laban Secondary School, ki la ai jaka sah shipor hapoh ka kamra kaba don hapoh ka skul ïa ka longiing jong u Bah Mawñiuh katba kim pat ïoh ïa ka iing kaba thymmai.
Kum ban shu pynkynmaw, ki thylliej ding ba rhem ki la pynkylla dpei ïa ka iing sah jong u Bah Mawñiuh uba trei kum u Chowkidar ka Raid Laban Secondary School kaba don ha ka shnong Madan Laban Shillong ha ka sngi u Blei ha ka por kumba 1:30 baje noh sngi.
Ka Kong T. Lyngdoh Nongpuir ka kurim jong u Bah Khrawbor M. Mawñiuh ha ka jingïakren bad u nongthoh khubor ka la ong, “ka ïing ka la sdang kem ding ha ka por kumba 1:30 baje noh sngi katba ma nga bad i kpa ngi dang thmu ban leit sha iing ïap briew. Hynrei tang shu poi ha Polo ngi la hap ban wan phai noh namarba ba ngi la ïoh jingtip halor kane ka jingjia.”
Haba kylli, ka la ong, “ki don tang ki khun ha iing, arngut ki khun shynrang ki don shabar katba hapoh ïing i don tang i khun kynthei bad iwei i khun paramarjan.”
“Nga ainguh ïa u Blei ba kam shym la jia kano kano ka jingjia ba sngewsih ïa ki khun. U Blei hi u tip kham bha,” la ong ka Kong Nongpiur.
“Katkum ka jingïathuh jong ki khun, nyngkong shwa ki la ïoh ïa ka tdem bad ka jingsma ingkhong jong ki waïar electrict. Mar kumta hi ki la ïoh sei tang ïa u Cylinder shabar hynrei baroh ki jingdon jingem hapoh ka iing ki la ingkhong lut ploiñ,” la ïathuh shuh shuh ka Kong Nongpiur.
