Shillong, Nailur, 16: U Myntri Rangbah ka Jylla u Conrad K. Sangma u la ai ka jingkular ba ki nongleh kam bymman kiba donkti ban pynïap dusmon ïa i heprit ba dang 4 snem ka rta ha Nongrah, Shillong shen kin sa ngat ha ki kynjri jong ka aiñ.
Ha ka jingïakren bad ki lad pathai khubor ha ka sngi Baar, u Sangma u la pynpaw ïa ka jingsngewlem ïa ka longiing kaba la mad ïa ka jingjia ba sngewsih kthang.
U la pynpaw ruh ka jingshaniah ha ka jingtohkit jong ki Pulit, da kaba ong ba ki bor ka aiñ ki la trei miet la bad sngi ban ïohkem ïa ki riewbymman.
“Nga pynpaw ïa ka jingsngewlem ïa ka longiing bad kaei kaba la jia ka long ka bym lah satia ban pdiang daleilei ruh em,” u la ong.
U Myntri Rangbah u la ong shuh shuh, “la ïathuh ïa nga da u Symbud Myntri Rangbah ba ki la ïaid shaphrang bha ha ka jingtohkit. Ngan ym lah ban kren shaphang kata ïa mynta namarba ka dang don ha ka jingtohkit hynrei u Symbud Myntri Rangbah u la pyntip ïa nga ba ka jingtohkit ka dang ïaid bad shen yn sa lah ban kem ïa kiba donkti.”
Lah ban kdew hangne ba i heprit Insaphira Lyngdoh Mawnai i la jahrngai na phyllaw ïing ha Nongrah, Shilong ha ka step Sngi U Blei. La lap ïa ka met jong i kaba la pynthiah ha ka um da kaba ban da u maw na met hapoh kawei ka iing kaba dang shna hajan ka iing sah jong i ha ka step Lah Sngi u Blei.
Ki Pulit ka East Khasi Hills District ki la thaw da ka Special Investigation Team (SIT) ba la khlieh da u SP (City) Bah Herbert Kharkongor ban pynlong ïa ka jingtohkit kaba bniah halor kane ka jingjia bad da ka jingkhmih jong u SP ka East Khasi Hills District u Bah Vivek Syiem.
Ki Pulit ki la tohkit ruh ïa ki nongsakhi bad lum ruh ïa ki sakhi sabut ban dup ithuh ïa ki nongleh kam sniew kiba donkti ha ka kam bymman.
