Shillong, Naiwieng, 13: Ka Meghalaya Tribal Teachers Association (MeTTA) ha ka sngi Balang ka la ong ba lada jia eiei ïa ki samla pule ka Ministry of Education jong ka Sorkar India ka dei ban shim ïa ka jingkitkhlieh.
Ki samla pule ka skulbah NEHU kiba don hapoh ka lama jong ka North Eastern Hill Univeristy Students Union (NEHUSU) ki la pynlong da ka jingshah thngan ba khlem pud sngi da ka jingkyrshan lang jong ka KSU NEHU Unit kaba la kynjoh mynta sha ka phra sngi khyndai miet ban dawa ban pynhiar shuki ïa u Vice Chancellor ka skulbah NEHU u Prof. P.S Shukla.
Kane ka jingdawa jong ka NEHUSU bad ka KSU NEHU Unit ka long namar ka jingmynthi jong u Prof. PS Shukla ban wengkam ïa u Registar u Omkar Singh bad ïa u Deputy Registrar u Amit Gupta kynthup ruh ïa ki nonghikai bad ki nongtrei ba la shu thungkam be-aiñ bad ban thung ruh ïa ki Pro Vice Chancellor ha Shillong bad ha Tura Campus.
Ha ka jingïakren bad ki lad pathai khubor u Dr. DRL Nonglait u la kyntu ïa ka Ministry of Education ka Sorkar India ban pynbeit noh mardor ïa kine ki kynrum kynram hapoh ka skulbah NEHU namarba ka jingim jong ki samla pule mynta ka don ha ka jingma na ka jingpynlong ïa ka jingshah thngan ba khlem pud sngi.
“Ka Sorkar ka dei ban pynbeit noh ïa kane ka kam namarba ka jingim jong ki samla pule ka don mynta ha ka jingma,” ula ong bad bynrap, “la khyndai sngi ki la shah thngan kan shimpor haduh ar ne lai bnai ba kin ïoh biang ïa ka bor bad nalor ba ki la duh ïa ki jingpule lada jia eiei ka Sorkar ka hap ban shim ïa ka jingkitkhlieh.”
“Imat na ka liang jong ka Sorkar Jylla, u Myntri Rangbah, u Chief Secretary bad u Lat ki la shimkhia ïa kane ka kam bad ki la ïakren bad ka Ministry of Education bad nga ngeit ba ka tnat ka la shimkhia ïa kane ka mat namarba kam long shuh ka jingjia ha nongbah Shillong hynrei ka la dei hi ka mat kaba la kren ruh ha baroh kawei ri,” u la ong.
“Ngi kwah ruh ïa u Lat ka Jylla, ïa ka Sorkar Jylla bad ka Ministry of Education ki dei ban sngewthuh ïa ka jingdawa jong ki samla. Mynshwa ka jingdawa jong ki ka long tang ban weng ïa u Registrar, ïa u Deputy Registrar bad ka jingtohkit halor ka jingthungkam beaiñ ïa ki nonghikai bad ki nongtrei hynrei u Vice Chancellor um leh eiei dei na kata ka daw ki la rai ban pynlong da ka jingïakhih kaba tyngeh,” la ong u Dr. Nonglait uba la leit jngoh bad ban ai mynsiem rynrkat bad ki para nonghikai ïa ki samla pule kiba shah thngan.
“Mynta ki samla pule ki la dawa ba dei ban weng beit ïa u Vice Chancellor bad ka Sorkar India ruh ka dei ban sngap ïa ka jingdawa ba mynta da kaba weng shwa ïa u Vice Chancellor bad ban thung Acting Vice Chancellor da Senior Most Proffessor jong ka skulbah NEHU,” u la bynrap u Dr. Nonglait.
Haba pynpaw ba ka Ministry of Education kam dei ban ïaid lait ïa ka NEHU Act bad Statutes, u Dr. Nonglait u la ong, “katkum ka NEHU Statutes lah ban thung ïa ki Pro Vice-Chancellor lymda kumta ban thung Pro Vice-Chancelor da ka Ministry of Education ka Sorkar India ma ngi ki nonghikai kiba pule ïa ka NEHU Act bad Statutes & Regulations ka long ka jingleh bakla. Ngi khmihlynti ba ka Ministry of Education kan ym pyndonkam bakla ïa ki Statutes jong ka skulbah NEHU. Ka kamram ban thung Pro Vice Chancellor kam dei ka kamram jong ka Ministry of Education hynrei ka dei ka kamram jong u Vice Chancellor ne u Acting Vice Chancellor ban wanrah ïa ka jingtyrwa ïa ki kyrteng ha ka Executive Council.”
U la ïathuh shuh shuh ba ha jingïasyllok jong u bad ki samla pule ki la kut jingmut ban len ïa lade bad lada ki bor kiba dei peit ïa kine ki jingeh kim pynurlong ïa ki jingdawa ban pynhiar shuki ïa u Vice Chancellor ngam tharai ba kin sangeh noh ka jingshah thngan.
“Kyrmen ba ka Sorkar India kan leh ïa kaei kaba ki samla pule ki la dawa katkum ka hok ba ki dei ban ïoh,” u la bynrap.
