Shillong, Jylliew, 23: U Myntri ka Sorkar Jylla uba khmih ïa ka tnat Pule Puthi u Rakkam A. Sangma ha ka Lah Sngi u Blei u la ong ba ka kyrdan jong ka Meghalaya kaba paw ha ka Performance Grading Index (PGI) ki dei beit na ki jingtrei shitom jong ka Sorkar.
“Ha ki 20-30 snem ba la leit noh, ka Sorkar Meghalaya kam shym la phaikhmat than ban pynthymmai bad ban pynbeit ïa ka pule ka puthi, ban tei ïa ki jingdonkam jong ki skul bad ïa ka pule puthi la shu ieh shrah ha ki 20-30 snem ba la leit noh,” la ong u Sangma ha ka jingïakren bad ki lad pathai khubor.
“Ka Sorkar kam shym la tei ïa ki jingdonkam jong ki skul. Ym don bording, ym don blackboard, ym don kamra klas, ïa ka iing skul la shu ieh shrah ha ka jingjot rathai. Kam don ka jingpynrung kyrteng ïa ki khynnah bad bun ki nonghikai ruh kim leit hikai sha skul. Kine ki dei kiba jia ha ki 20-30 snem ba la leit,” la ong u Sangma.
“Haba ïohi lut ïa kine, u Myntri Rangbah u la shong pyrkhat kumno ban pynthymmai ïa ka tnat Pule Puthi bad mynta ka Sorkar ka la sdang ban pynbha ïa ki iing skul ha baroh ki skul Sorkar. Ha ki ar-lai snem ba la leit noh, palat 2700 tylli ki skul ladep ban shna pynbha bad palat 700-800 ki skul ki la ïoh ïa ki iing skul ba thymmai kiba paka. Ngi la shna ïa ki paiñkhana, ngi la pynthikna ruh ba ki nonghikai ki dei beit ban leit hikai sha skul manla ka sngi,” ïathuh u Sangma.
“Namar kata, ka jingïoh kyrdan biang ka Meghalaya kan sa paw hadien 2-3 snem,” u la ong.
“Kaei kaba ngi ïohi mynta ka dei ka jingtrei shitom. Kaei kaba ngi leh mynta kan paw ha u soh lashai ne la shi sngi. Phin sa ïohi ïa u soh ïa ki jingtrei jong ngi,” la bynrap u Sangma.
Halor ka jingkynthoh jong ki seng saiñpyrthei, u Sangma u la ong, “kano kano ka seng saiñpyrthei kaba kynthoh ïa ka Sorkar ki hap ban phai dien shwa mano ba don ha ka bor synshar ha ki 10-15 snem mynshwa. Phi dei ruh ban sngewthuh ba phi ruh phi don ïa ka jingkitkhlieh namarba ka dei na ki kam jong phi kaba pynpaw mynta ïa u soh bad kaei kaba ngi leh mynta kan sa paw ha u soh lashai,”
“Haoid, ha ka jingïoh kyrdan ha ka PGI ka ïadei lut baroh naduh ki jingtei, ka jingai jinghikai, ki don bun ki kyndon bad ki daw,” u la ong.
U la ong shuh shuh ba ka Sorkar kan nang ïai trei shitom ban pynjanai ïa ka pule ka puthi ha ka jylla Meghalaya tad haduh ban da kynjoh sha ka thong.
 | ReplyForwardAdd reaction |
