Shillong, Nohprah 20: Ki nongïalam jong ka Ri Bhoi Commercial Pick-up Owners and Drivers Association (RBCPO&DA) ha ka sngi Thohdieng ki la mudui da ka ejehar ha ki Pulit ka Byrnihat Police Outpost pyrshah ïa ki bar jylla kiba pynïaid ïa ka ïew khaii Muida ha ka thain Byrnihat khlem ki kot ki sla kiba biang.
U President jong ka Association u Bah Stanwella Manih ha ka jingïakren bad ki lad pathai khubor u la ong ba ka seng kam banse ban mudui da ka ejahar ha ki Pulit namarba ka jingpynïaid jong ki bar jylla ïa ka ïew khaii Muid ha Byrnihat, kaba dang hap hapoh u pud u sam jong ka Ribhoi District khlem ki kot ki sla kiba biang.
U la ong ruh ba kine ki bar jylla ki la kyntait wat ban aikam ai jam ïa ki samla ka Ribhoi District watla ka ïew ka dei kaba don hapoh Ribhoi District.
Kine ki nongïalam ki la kynnoh ruh ba ki bar jylla kiba pynïaid ïa ka ïew khaii Muid ki shu kular tang ka ktien ban aikam aijam ïa ki samla trai shnong hynrei ki jingkular ki shu ku tang ha ka jingïakren namarba ha ka ïohkam ïohjam ki dei beit tang ki bar jylla.
Shuh shuh ki la kynnoh ba ki briew kiba don bynta ha ka kam khaii Muid ki dei beit tang ki bar jylla ki bym don kot don sla namarba ki don ka jingïadei bad kita ki High Level.
Ka seng ka la dawa ba dei ban khang shwa shipor katba ym pat lah ban ïa pynbeit.
