Shillong, Nailar, 29: Ki Contractor ka them Ri Bhoi kiba don hapoh ka shatri jong ka All Ri Bhoi Government Contractors and Suppliers Association ha ka sngi Thohdieng ki la ïakynduh lang ha ka shnong Sajer, Nongpoh ban ïakren kyrpang halor ka jingeh jong ki local Contractor ha them Ri Bhoi District ha kaba bun na ki kam la trei da kiwei pat ki Contractor na kiwei ki district.
Ha kane ka jingïalang ba la ïashim bynta da ki spah ngut ki Contractor ki la pynpaw ruh ruh ïa ki jingeh na ka daw ka jingbym ïohkam shuh ha ki tnad treikam bapher bapher jong ka sorkar bad la kynnoh ruh ba ïa ki kam ki jam la ïohbat lut da ki biew kiba na shabar bad kita ki High Level Contractor.
Ka jingïalang ka la ïakren ruh halor ka jingwanrah jong ka sorkar da ka Package kaba heh kaba kot da ki klur tyngka ïa kaba la trei beit da kita ki High Level Contractor.
U Vice President jong ka seng u Bah Plielad Tiewsoh u la ïathuh ba ka jingïalang ka la rai ban sa leit ïakynduh shen ïa u Myntri Rangbah ka jylla u Conrad K. Sangma ban pynsngew ïa ki jingeh ba ki Local Contractor ki ïakynduh bad ban dawa ruh ba 80% ki kam ki jam hapoh ka Ribhoi District dei ban ïoh da ki local Contractor.
