Shillong, Jylliew, 26: Ka tnat Transports jong ka Sorkar Jylla ka la pynmih da ka Circular ban pyntip ba ki riewpaidbah mynta ki la lah ban kamai da ki kali shimet hadien ba ka Sorkar ka la pyntreikam da ka Motor Vehical Act bad ka Central Motor Vehicle Rules.
“Kane kam dei shuh kaba dang thymmai hynrei ka long katkum ki kyndon jong ka Motor Vehical Act bad ka Central Motor Vehicle Rules,” ong u Commissioner Transport u D.D Sangma ha ka jingïakren bad ki nongthoh khubor ha ka sngi Palei.
U la ïathuh ba ka Sorkar Jylla mynta ka la pynkhreh ruh ïa ka Standard Operating Procedure ha kaba ïadei bad ka jingpynmih ïa ki kyndon jong ka ‘Rent a Bike Scheme’ bad ka ‘Rent a Cab Scheme’ ïa kaba yn sa pynbna shen da ka Sorkar Jylla.
U la ïathuh ba ka jingpynmih ïa kane ka skhim ka long hadien ba ka jylla ka la don ïa ka rul kaba ai jingbit ïa ki thuk thuk ar sha ka ban kamai ha surok ïa kaba la tip kum ka Meghalaya Bike Taxi Aggregator Rules.
Shuh shuh u la ong ba kino kino ki riewshimet ne ki kynhun kiba thmu ban pynïaid ïa ki Bike Taxi kum ki kali kamai ki hap ban register ïalade hapoh ka ophis District Transport Officer (DTO).
“Namar ka jingrem ka bai registration hapoh ka Meghalaya Bike Taxi Aggregator Rules kiba bun ki riewshimet ki ïakynduh jingeh hynrei ban weng ïa kane ka jingeh, lyngba ka ‘Rent a Bike Scheme’ bad ka ‘Rent a Cab Scheme’ ka Sorkar ka la weng ïa ka jingeh. Ka Sorkar lyngba ka tnat Transports ka la pynmih ïa ka jingtyrwa ba khot ïa ki Software Developer Enterpreneur, IT Patner bad Mobility Aggregator Application,” la ong u Sangma.
