Shillong, Jylliew 10: U Myntri ka tnat Pule Puthi u Rakkam A Sangma ha ka sngi baar u la ong ba hadien ba ka jingshisha baroh ba sha lyndet halor ka jingshah pynïap ba dangshen jong u nongwan jngohkai pyrthei na Indore ka la dep ban paw pyrthei, kito kiba pynsniew dur ïa ka jylla Meghalaya ki dei ban panmab.
“Nga sngew ba kito kiba kynnoh ïa ka Meghalaya bad ïa ki briew jong ngi ki dei ban panmab,” ong u Sangma sha ki lad pathai khubor.
U Myntri ka sorkar jylla u la ong ba u sngew mong ban ïohi ba ki briew ha social media bad ki lad pathai khubor na ri thor ki kynnoh ïa ka jylla bad ki briew khlem da tip ïa ki jingshisha jong kane ka jingjia.
“Ngim dei ki briew kiba long kumta bad ka jingshisha baroh mynta ka la paw bad la sei madan mynta,” u la ong da kaba ïaroh ruh ïa ki pulit halor ka jingsted ban shim kam pyrshah ïa ki runar ba kynthup ruh ïa ka jingkem ïa ka, ka kurim jong u Raja Raghuvanshi, u lanot ba la shah pynïap ha ka por ka jingwan honeymoon sha Sohra.
U Sangma u la ong ba ki briew na ka jingsngew bad ka jingkulmar jingmut ki la shah pynbor ban ong kat kaba ki sngi hynrei kaei kaba donkam ka long ba mynta baroh ki jingshisha ha kaba khatduh ki la paw lut.
