Shillong, Jylliew, 16: U Superintendent of Police (Traffic), ka East Khasi Hills district u K. Prasad, u la pyntip ba ki Pulit ka district kin sa nang pynjur shuh shuh ïa ka jingtalasi kali ha ka por mynmiet ban khanglad ïa ka jingleh stunt jong ki nongñiah thuk thuk ar shaka.
Ha ka jingïakren bad ki lad pathai khubor ha ka Lah Sngi u Blei, u SP Prasad u la ïathuh ba ki Pulit kin ïai bteng ban talasi kali ha ka por mynmiet kylleng ka nongbah Shillong bad lada lap ïa kino kino kiba ñiah kali khlem akor yn pynshitom katkum ki kyndon aiñ ñiah kali.
U la ong shuh shuh ba kum kine ki kam ñiah kali khlemakor ka tnat Pulit kan ym ailad satia.
U SP u la ïathuh ruh ba ki Pulit kin ïai talasi ïa ki kali ha ka por mynmiet khnang ban khanglad ïa kino kino ki jingjia ba sngewsih.
U la ong ruh ba ka jingtalasi kali kan ym long tang ha sor Shillong hynrei wat ha New Shillong bad kiwei kiwei ki shnong ha khap sor.
