Shillong, Risaw, 05: Ka jingther jong u lapbah lapsan ar sngi kynthih ka la wanrah ïa ka jingïap briew kaba kot haduh 10 ngut tang ha rilum Garo ha kine ki 48 kynta ba la leit noh.
U Myntri Rangbah uba don mynta rilum Garo u la lum ïa ka jingïalang pyrkhat kam ha ka sngi Saitjaiñ ban lum jingkheiñ ïa ki jingjia ba sngewsih bad ki jingjulor na ki jinglynshop ki bor ka mariang hadien ka jingther jong u lapbah lapsan ha rilum Garo.
10 ngut ki briew ki la duhei ïa la ka jong ka jingim ha kine ki 48 kynta ba la leit noh, ha kaba 3 ngut ki dei na ka shnong Dalu, West Garo Hills District bad 7 ngut ki dei na South Garo Hills District ha kaba ki la khladnoh na ka jingtwa khyndew.
Ka jingther jong u lapbah uba jur ha ka shiteng miet jong ka sngi Thohdieng ka la wanrah ïa ka jingshlei um ha ka shnong Dalu, West Garo Hills bad ïa ki bynta rithor jong ka rilum Garo. Ka Gasuapara kaba don ha South Garo Hills ka la shah ktah bha na kane ka jingshlei um ha kaba kawei ka jingkieng ka la shah rong ha ka umbah umsan.
U Myntri Rangbah u la bthah ïa ki bor synshar district ban pyllait noh mardor ïa ki song jingïarap pisa sha ki bahaing hasem jong ki lai ngut ki riewpaidbah kiba la duhei ïa ka jingim ha Dalu.
U Sangma u la bthah ruh ïa ki bor synshar district ban pan jingïarap na ka Sorkar bad ban pynthikna ba ki jingïarap kin poi sha ki jaka ba la shah ktah.
Hynñiew ngut ki briew kiba la duhei ïa ka jingim ka la jia ha ka shnong Hatiasia Songma kaba hap hapoh ka Gasuapara PS ha South Garo Hills. Kine ki hynñiew ngut ki la ïap na ka jingtwa ka khyndew kaba la tep im ïa ki.
Ka kynhun jong ka National Disaster Response Force (NDRF) ki la hiar sha kine ki jaka ba shah ktah ban ai jingïarap ïa ki lanot kiba la shah ktah.
Ka surok kaba pynïasoh na Dalu sha Baghmara bad sha kiwei kiwei ki jaka ki la shah ktah na ka daw ka jingtwa jong ka khyndew.
Ha kajuh ka por, u Myntri Rangbah u la bthah ïa ki bor synshar district ba kin wad lynti nawei pat ban ïoh bteng ïa ka leit ka wan na Dalu sha ka thaiñ Baghmara.
U Sangma u la bthah ruh ba ka jingkieng dieng kaba la kdiah bad shah rong ha ka umsaw dei ban shna noh mardor.
U la ai jingmut ruh ban shna shwa shipor da ka jingkieng nar ba shu pyndait (Bailey Bridge technology) ban ailad na ka bynta ka leit ka wan ki paidbah.
Shuh shuh u Myntri Rangbah u la pyntip ha ka jingïalang ba la phah lum jingkheiñ ïa ki jingdon jong ki jingkieng dieng ba la shna ha ka jylla ha kaba yn sa shna bujli noh da kiwei pat.
Ki ophisar ki la pyntip ruh ba la maramot ïa ka bording ha kiba bun ki shnong jong ka rilum Garo ha ka sngi Saitjaiñ.
U Myntri Rangbah u la bthah ïa ki tnat treikam ba kin kham trei shitom na ka bynta ban ïarap ïa ki paidbah bad ban pynthikna ruh ban ïarap haba wan jia kino kino ki jinglynshop na ki bor ka mariang.
U la bthah ruh ïa ki bor synshar district ba kin long kiba peitngor bha ïa ka jinglong jingman jong ka suiñ bneng bad ka mariang.
