Shillong, Lber 04: Ka jingbym thung nonghikai jong ka Sorkar Jylla la jan lai snem kynthih ha ki skul SSA ha kylleng ka jylla Meghalaya ka la wanrah ia ka jingkiew bha ka jingpep skul shiteng por jong ki khynnah watla ka jingthmu jong ka prokram Samagra Shiksha Abhiyan (SSA) jong ka Sorkar Pdeng ka long ban khring ia ki khynnah sha ki skul pule bad ban pynduna ia ka jingpep skul shiteng por jong ki khynnah.
U President ka Meghalaya SSA School Association (MSSASA) Bah Aristotle C. Rymbai ha ka jingiakren bad ki lad pathai khubor ha ka Lah Sngi u Blei ha Shillong Press Club u la ong, “ngi la iakynduh ia u State Project Director ka Samagra Shiksha u Swapnil Tembe uba dei ruh u Director jong ka School Education and Literacy (SEL) ka Sorkar Jylla, ban tyrwa ia ka Sorkar ba kan thung noh ia ki Post ba thylli ha ki skul SSA ha ka Lower Primary bad Upper Primary kiba shu sah thylli naduh u snem 2021 ter ter haduh mynta jan lai snem.”
“Ngi iohi ba ka lah bha ia kito ki skul ki bym don nonghikai,” u la ong bad ai nuksa, “mynshwa ka jingdon jong ki khynnah skul ki long 50 haduh 60 ngut ki khynnah hynrei namar ka jingiohkam noh ki nonghikai shawei bad ka jingbym thung nonghikai ka Sorkar ka jingdon jong ki khynnah ha ki skul SSA ka la sdang hiar. Ki don leilei ki skul kiba don tang hapoh 10 ngut ka buh jingeh.”
“Ngi la kyrpad ia u State Project Director ban thung noh ia ki nonghikai ha ki skul bym don nonghikai khnang ba ki khynnah skul kin ym shah ktah ha ka pule ka puthi,” u la bynrap.
U la iathuh ba u State Project Director u la kular ba un sa iakren bad ka Sorkar halor kane ka jingpynsngew jong ka Association.
Shuh shuh u la iathuh ba u Project Director u la pyntip ba ki don ki skul SSA ki bym don khynnah skul bad ka Sorkar ka lah ban shim ia ka sienjam ban thung nonghikai ha ki skul ba kham bun ki khynnah skul.
“Ngin sa iakynduh ia u Myntri ka tnat Pule Puthi ban pynsngew halor kane bad ban ioh shuh shuh ia ka jingshai ia ka jingthmu jong ka Sorkar ha kaba iadei bad ka jingthungkam ia ki nonghikai ha ki skul SSA ba ki post nonghikai ki la sah thylli,” u la ong.
U Project Director u la ong ruh ba ka Sorkar kam banse ban khang khyrdep ia ki skul SSA ki bym don khynnah bad ngi kyntu ia ki skul SSA khamtam ia ki Head Teacher ba kin shimkhia bha halor kane.
Haba kylli, u la ai nuksa da kaba ong, tang ha East Khasi Hills, ki post nonghikai kiba thylli ki don ym duna 89 tylli ha ka Upper Primary bad ha ka Lower Primary 22tylli, ha East Jaintia Hills ki post kiba thylli ha ka Upper Primary ki don 27 tylli bad ha Lower Primary ki don 21 tylli.
Ha kajuh ka por, u la iathuh ba ka seng ka la phah ruh ia ka jingthoh sha ka Chaiperson jong ka Meghalaya State Education Commission (MSEC) ka Prof. Sherwin May Sungoh halor ka jingdawa ban pynkynriah noh ia ki 12, 541 hajar ngut ki nonghikai skul SSA na ka State Implementation Society (SIC) sha ka tnat Pule Puthi ka Sorkar Jylla katkum ki kyndon jong ka Right to Education Act bad ka SSA.
Kane ka jingdawa jong ka MSSASA ka long hadien ba ka Sorkar ka la thaw ia ka State Education Commission hadien ka jingiakhih jong ki nonghikai skul SSA ha nongbah Shillong.
