Shillong, Naiwieng, 20: Ka Pay For Right Football Academy bad ka Mylliemlum Sports Club ki la long ki ar tylli ki kynhun ialehkai kiba la ioh kiew sha ka kyrdan 2nd Division Football League ban sa pynlong da ka Shillong Sports Association ha ka aiom ialehkai jong u snem u ban sa wan.
Ha ka jingiakhun phainal ha ka 3rd Division Football League 2023 kaba la long ha madan ialehkai First Ground, ha Polo ha ka lah sngi U Blei ka Pay For Right Football Academy ka la iohrah syndon ia ka nam lahduh ha kane ka jingialehkai jong kane ka aiom da kaba pynliem noh da 2-0 kol ia ka Mylliemlum Sports Club.
Ia kine ki ar tylli ki kol la ioh thep da u Robi Maring ha ka minit kaba 62 bad u Andy Suting ha ka minit kaba 70 ha ka jingiakhun jong ka kylla miet ha kane ka lympung ialehkai phainal ba la pynlong da ka Shillong Sports Assciation.
Ka PFR FA kaba la long ka lah duh ka la ioh khur ia ka song pisa kaba T.40 hajar katba ka Mylliemlum kaba wan baar ka la ioh pdiang ia ka song pisa kaba T.20 hajar. Ha kane ka sngi, la sakhi lang da ki nongpyniaid jong ka SSA bad kiwei kiwei kiba la shah khot sngewbha.
