Shillong, Lber, 15: U Commissioner ka tnat Transport ka Sorkar Jylla Bah E. Kharmalki ha ka sngi Thohdieng u la maham ïa ki paidbah kiba ju shong da ki Rapido kin hap ban shim hi ïa la ka jong ka jingkitkhlieh namarba kane ka Kompeni kaba na Bengalore, Karnataka kam pat don satia ïa ka Permit ba la ai da ka tnat Transport ka Sorkar Jylla ban kit ïa ki nongleit nongwan hapoh kane ka Jylla Meghalaya.
“Haduh mynta ki dang don tang ar tylli ki Aggregator kiba la ïoh Permit, ka JETS 24×7 bad ka NE Rider ban kamai da kaba kit ïa ki paidbah nongleit nongwan,” ong u Bah Kharmalki haba ïakren bad ki nongthoh khubor.
“Ka Rapido ka ïoh ïa ka Temporary License na ka bynta 6 bnai namarba ha kato ka por ka Aiñ bad ka Rule kam pat don bad mynta ïa ka Rule la pynbna paidbah bad ki la tip ba ka Rule ka la don bad ki la sdang ban aplai ïa ka Permit,” u la ong.
“Ngi dang wad uei u briew uba pynïaid (ïa ka Rapido) bad ngin sa phah Show Cause Notice ïa u bad ban pynduh noh ïa u App jong ki. Mynta u App jong ka Rapido u don lut ha ka kti jong ki paidbah ha ki Mobile Phone bad lyngba kane ka khubor ki paidbah kin tip ba lada ki dang leit jingleit da ka Rapido kin hap ban shim hi ïa la ka jingkitkhlieh bad kano kano kaba jia eiei ïa ki kin hap ban kitkhlieh hi,” la maham u Commisioner Transports bad bynrap, “mynta ngi don ïa ki Aggregator ba la ithuh da ka aiñ kiba don ïa ki GPS Device kiba ngi lah ban tohkit shaei ki leit ki wan.”
Haba kylli, ula pynshai ruh ba ka jingbym lah ban khanglad ïa ka Rapido naduh ki snem baladep ka long namarba ka Sorkar kam pat shna ïa ka Rule.
Halor ka jingpynrung ïa ki nongniah thuk thuk hapoh ka Rapido u Commissioner ka tnat Transports u la ong, “ngi la ïoh jingtip halor kane bad ngin sa tih bniah kaei kaba jia bad lada donkam ngin hap ban mudui da ka ejahar bad ban pynshitom.”
U la ïathuh ruh ba u la lum jingïalang ïa ki Aggregator ba kin ïoh pynrung briew kham bun bad ba ki paidbah kin dup tip ba ki don ki License Bike Taxi. Ïa mynta kiba la ïoh permit kum ki Bike Taxi ki dei ban don ïa ka Number Plate rong stem bad ki hap ban da tah ïa ki Sticker Bike Taxi ha ki thuk thuk. Ki dei ban don ruh ïa ka Mobile App. Ynda ki paidbah ki la tip shaphang ki Bike Taxi, ki Traffic Police bad ki Pulit Enforcement kin sa leh ka kamram. Kine ki kynhun ki dei ban don ïa ka Transport Permit ba ki lah ban kit ïa ki nongleit jingleit.
“Ngin sa pyntip paidbah ba ki la don ki Aggregator kiba la ithuh da ka aiñ bad ngin sa ai notis ïa kito kiba shu ïaid beain bad lada ki kwah ban kamai jakpoh ki dei ban wan rejistar kum ki Aggregetor lane ki lah ban rejistar ïalade hapoh kine ki Aggregators kiba la don lypa,”u la ong.
“Kino kino (kiba kwah kamai) ki lah ban ïoh ïa ka laisen, ki lah ban wan shakhmat ban ïoh laisen bad kito kiba ju mlien ban kamai be-ain ki lah ban pynïasoh noh ïalade bad ki Aggregator kiba la don lypa ban ïoh ïa ka laisen. Hadien kata, hapoh 10 ne 15 sngi ngin sa pyni da ki kam ban leh pyrshah ïa kito kiba shu kamai beaiñ,” u la bynrap.
“Ngim kwah ban pynduh jakpoh ïa ki briew, hynriew ka jingkamai jakpoh ka dei ban long da ka lynti kaba ki paidbah nongleit nongwan ruh ki dei ban shngaiñ,” u la ong.
