Shillong, ïaïong, 12: U MP ka Rajya Sabha na Meghalaya u Dr. Wanwei Roy Kharlukhi ula ong ba kam long kaba suk ban pynbor ïa ka Sorkar India ba kan pynurlong ïa ki jingdawa jong ki jaidbynriew na ki jylla ka thaiñ Shatei Lammihngi.
Ha ka jingïakren bad ki lad pathai khubor dang shen, u Dr. Kharlukhi u la ong, “nga la kren ha Parliament (ïa ka jingdawa ban pynrung ïa ka ktien Khasi bad Garo ha ka Khyrnit Baphra jong ka riti synshar ka ri India), ym dei tang ma nga, hynrei wat kiwei ki MP ruh kynthup ka Agatha K Sangma, u Bah Vincent H. Pala bad u Dr. Ricky J. Syngkon ruh ki la kren hapoh Parliament.”
“Kaei kaba nga ïohi ïa ka jingdon jong nga ha Parliament ba ngi na North East ngi shitom namarba ngim don ïa ka jingbun paid (ha ka jingdon jong ki MP ha Parliament) kumba long mynta haba ngi leit sha Parliament ki MP ka BJP ki leit la ka jong, ki MP ka Congress ki leit la ka jong,” u la ong.
Haba ai nuksa, u la ong, “naduh ka por ba nga dang long u samla pule, ngi la sngewthuh ha kato ka por ha ki snem 1979-80 ngi don kawei ka kynhun jong ki samla pule kaba khlain ka North East Region Students Union. Hato ka jingïakhih ngi dawa ïa ka Sorkar India ba kan pdiang ïa u snem 1971 kum u snem ot kyrteng (cut-off year) ïa ki mynder ri. Ngi la ïatylli da baroh ki kynhun jong ki samla pule jong ki hynñiew tylli ki jylla ha ka thaiñ Shatei Lammihngi. Hynrei kajuh hi.”
“Lada ngi leit marwei kam poi shaei shaei hynrei lada ngi leit kum ka kynhun bad shu mutdur lada ngi don ïa ka party na ka thaiñ Shatei Lammihngi kaba ngi lah ban don 20-21 ngut ki MP kane kan dei ka sur kaba lah ban ong ha kaba ka Sorkar India ka hap ban sngap,” la bynrap u Dr. Kharlukhi.
U la ong ruh ba lada ki Regional party kin ïatreilang kan jin da la bha palat. “Ngam ong ïa ki National Party namarba kine ki peit beit ïa ka jingmyntoi ha ka ri India baroh kawei. Ka BJP kan peit ïa ka jingmyntoi lajong, ka Congress kan peit ïa ka jingmyntoi lajong,” u la ong shuh shuh.
Haba kylli, u la ong, “ngi don ïa ka MP North East Forum hynrei ngi pyrshang ban kren hynrei ynda poi ka case kum ha ka jingjia ha ka jylla Manipur kum ka Forum ngim nud ban ktah ïa ki mat kiba buh jingsyier hynrei ka jingïakren ka long beit tang halor ka roi ka par bad kiwei kiwei.
U la ong shuh shuh ba wat ka Iingdorbar Thawaiñ jong ka Jylla ka ladep ai ïa ka jingmynjur ban pynrung ïa ka ktien Khasi bad Garo ha ka Khyrnit Baphra jong ka Riti Synshar ka ri India hynrei mynta da ki snem kam shym la urlong satia.
“U Purno A. Sangma u la don da ki phew snem ha Delhi u dei uba la wanrah ïa ka jingmut ban thaw noh ïa ka NPP ba kan long ka Regional Party ha kane ka thaiñ Shatei Lammihngi. Haoid, ngi don ïa ki MLA ha Meghalaya, ha Manipur, ha Arunachal Pradesh hynrei ngim pat lah ban ïoh bun ngut ki MP. Ha Parliament hi, khlem ki MP kan ym poi shaei shaei,” la pynpaw u Dr. Kharlukhi.
