Shillong, Nohprah, 01: U Nongaitkien ka BJP u Bah M. Kharkrang ha ka sngi palei u la ong ba kan long kaba bha palat lada u MLA ba la mihkhmat la hynriew sien kynthih ïa ka Pynthorumkhrah Constituency u Bah Alexander L. Hek uba long ruh u Myntri Sorkar un shah jied kum u kyrtong na Shillong Parliamentary Constituency na ka bynta ka elekshon Lok Sabha ka ban sa long ha u snem 2024.
“Lada mynjur ïa u Bah AL Hek, uba la long u MLA la hynriew sien kynthih, kan long kaba sngewtynnat palat,” ong u Bah Kharkhrang ha ka jingïakren bad ki lad pathai khubor ha ka sngi thohdieng.
Une u ophisar IPS barim u la ong ba ki nongïalam jong ka Party kim pat pan eiei halor kane. “Namarkata, kam pat don satia kano kano ka kyrteng ban phah sha Delhi ïa mynta,” u la ong.
U Bah Hek dang shen u la pynpaw, “ka shong ha ki nongïalam bahalor jong ka party ban shim ïa ka rai (ba ngan ïakhun ne ngam ïakhun).”
Une u Myntri Sorkar u la phla ruh ba ki don lai ngut ki kyrtong kiba kwah ban ïakhun ïa ka elekshon na Shillong.
Haba kylli, u Bah Kharkrang u la ong, “kam dei ka kam sngewbha ban sei kyrtong, hynrei ngi hap ban peit la ngi don ne em ïa ki kyrtong kiba biang.”
“Baroh ka long haba shai na ka bynta kiei kiei bad ngi kwah ban ïohi lada ngi ïoh ïa ka kyrtong kynthei. Ngim pat khang ïa ka jingkhang, ngi plie lut ïa baroh,” u la bynrap.
Ha kajuh ka por, une u nongaiktien u ong shuh shuh ba ka party kan ym ïatreilang badno badno ha ka elekshon Lok Sabha ka ban sa long.
“Kan ym don kano kano ka jingïatreilang. Ha ki elekshon ba ladep, ka BJP ka ïakhun beit (ïa ki elekshon) marwei,” u la ong.
