Shillong, Naitung, 31: U MLA jong ka South Shillong uba long ruh u nongïalam jong ka BJP u Bah Sanbor Shullai, u la leit jngoh ïa ka Khyndai Lad ha ka janmiet sngi Palei ban peit ïa ka jinglong jingman hadien ba la pynkynriah ïa ki nongdie madan da ka Municipal sha ka Parking Lot jong ka MUDA.
Ha ka jingleit jngoh, u Bah Sanbor u la rung ruh sha Parking Lot ban ïakren bad ki nongdie madan bad ban ai ruh ïa ki kyntien ai mynsiem bad ki kyntien pynshlur bad ban pynpaw ruh ïa ka jingkyrmen ba kin ïoh jingmyntoi shuh shuh na kane ka jaka die jingdie kaba paka ba la pynshna kyrpang da ka sorkar.
Ki paidbah tang shu ïohi ïa u Bah Bah Sanbor ki la pyrta da ka jingkmen bad don ruh napdeng jong ki, kiba la khot ïa u ban thied jingthied na ki dukan jong ki. Mar mar khlem da pynslem u Bah Sanbor ruh u la tur shajan dukan ban ai khublei bad ban ïakren bad ki nongdie madan khnang ban sngewthuh ïa ki jingeh bad ki jingshem jong ki naduh ba la pynkynriah sha kane ka jaka.
Shwa ban mih noh, u Bah Sanbor u la pynlut por khyndait ban ïakren bad ki Pulit kiba ap pahara ha iew die lang jong ka MUDA bad u la ai khublei ruh ïa ki.
Kane ka jingleit jngoh jong u ka long ban ïohi da la ki khmat ïa ka jingkylluid jong ka surok ha Khyndai Lad bad pynpaw ruh ïa ka jingkyrshan ban wanrah ïa ka jingkhuid suba ha ki jaka iew kiba don ha ka sor Shillong.
