Shillong, Naitung 04: Ka kynhun jong ki 100 ngut ki samla pule na ki 8 tylli ki jylla kane ka thaiñ shatei lammihngi ki la leit ban jngoh ïa ka Indian Space Research Organisation (ISRO) Centre ha Bengaluru naduh ka 26 haduh ka 27 tarik u Jylliew, kum shi bynta na ka North East Students’ Programme for Awareness, Reach, and Knowledge on Space (NE-SPARKS), ba la bei tyngka da ka North Eastern Council ha kaba ha kane ka jingleit jngoh ki samla pule ki la ïoh ban ïasyllok bad ki scientist ka ISRO.
Ïa ki samla pule la tyrwa ka lad kaba kyrpang ban sakhi ïa ki jingkiew ki kam haw haw bad ki kam wadbniah. Ha kine ki jingleit jngoh ba arsngi ha Bengaluru, ki samla pule ki la ïoh ban khmih ïa kiba bun ki kam kiba la don hapoh ka ISRO. Ha ka sngi kaba nyngkong ki la leit ban jngoh ïa ka ISRO Telemetry, Tracking and Command Network (ISTRAC). Ha ka sngi kaba ar pat ki la leit ïaid sha U R Rao Satellite Centre (URSC), kynthup ruh ïa ka jingleit jngoh ïa ka ISRO Satellite Integration and Test Establishment (ISITE). Ki samla pule ki la ïoh ruh ban peit ïa ki video jong ka jingjop ban test ïa Chandrayaan-3 mission.
Kane ka jingïoh lad jong ki ban jngoh ïa kane ka jaka ka la pynïar ïa ka jingsngewthuh jong ki haba ïadei bad ka space science bad ka la pynktik ïa ka jingkwah jong ki ban pule ha ka kam astronomy, space research, bad Science, Technology, Engineering, and Mathematics (STEM).
Kane ka jingleit jngoh ka long shi bynta na ka jingsdang ban ailad ïa ki samla pule kumba 8 spah ngut kiba don ka sap ha ka saïan, haba 100 ngut ki dei na manla ki 8 tylli ki jylla kane ka thaiñ shatei lammihngi kiba la ïoh ïa kane ka lad ban jngoh ïa ka ISRO. Kumba long haduh mynta ki la don 2 tylli ki prokram ba la pynlong kiba ïadei bad kine ki jingleit jngoh ba kynthup ïa kane kaba mynta. Kane ka programme la pynwandur ban pynshlur ïa ki samla ba kin ïoh ka lad ban jngoh bad kumjuh ruh ba kin lah ban ïakren bad ki scientist jong ka ISRO bad ki engineer lyngba ki guided tour bad ki jingiatai nia.
