Shillong, Jylliew, 09: Katba ka jylla baroh kawei ka dang pynleit jingmut sha ka jingjia ïa ki arngut ki shi kurim ha ka shnong Sohra, kyndit kynsan ha ka Lah Sngi u Blei la saphriang kawei ka video ha ka Social Media ba la pyntip ba u trai jong ka Thrills Fun Park kaba don ha ka shnong Mawleiñ Mawkhan, Ri Bhoi District bad ki nongtrei ki la shah ktah kti ha uwei u nongjngohkai pyrthei na ka jylla Uttar Pradesh.
U trai jong ka Thrills Fun Park ha ka jingïakren bad u nonglum khubor ka Batesi Tv ula ïathuh ba une u nongjngohkai pyrthei u dei u shipai uba wan kai ha kane ka Park bad ki bahaing hasem ha ka sngi Saitjaiñ jong ka taiew baladep.
Ïa ka jingshah ktah kti jong u trai ka Thrills Fun Park la sakhi lyngba ka CCTV Footage kaba la saphriang bad nalor kata la sakhi ruh ba une u nongjngohkai pyrthei u la pynjot bad pynpra ruh ïa ki jingdon jingem hapoh ka Park.
Haba kylli, u trai jong ka Thrills Fun Park u la ong ba ym kwah ban ujor ïa kane ka jingjia sha ki Pulit namarba ki don lang ki khynnah rit bad ïathuh ruh ba ïa kane ka jingjia ladep ban ïakren pynbeit hapdeng jong u bad une u nongjngohkai pyrthei.
