Shillong, Nailur, 04: Ki dkhot ka Hynñiewtrep Youths Council (HYC) kiba la ïoh ujor na kiba bun balang ba ki ju don ki briew kiba ju mlien ban dih drok pylleiñ pylleiñ ha Golflink, Shillong ki la pynlong ïa ka jingkhynra ha kane ka jaka jngohkai kaba ki paidbah ki ju smat ban leit bam lyer pyngngad manla ka sngi.
Ha ka step sngi Balang, ki dkhot jong ka HYC ba la lamkhmat da u Vice President u Bah Donbonlang Kharlyngdoh kiba la hiar sha Golflink ki la lap ba ki don shisha ki briew kiba dih drok ha kane ka jaka da kaba pyndonkam ruh ïa ki thyrnia injekshon.
Katba ki dkhot ka seng ki dang kthong ïa uwei na ki nongkhaii drok, ki don katto katne ki nongdih drok kiba dang thied ki la leit phet bad ki don katto katne kiba ki dkhot ka HYC ki la ïoh bat.
Ïa ki nongdih drok kiba ka HYC ka la ïoh bat la bthah ba kin leit mih bad ki bahaing hasem ha ophis treikam jong ka seng khnang ban ïoh ïasyllok bad ban pynbeit ïa ka jingim ka jong ki hadien ba ki la im kyrni ha u drok.
Ha kane ka step, ki dkhot ka HYC ki la lap ruh ïa uwei u shipai BSF uba don ha ka Uniform uba la thiah lyngktar ha madan ha kawei ka sem shongkai pyngngad ryngkat bad uwei u shipai BSF ïa uba ka HYC ka la suba ba u lah ban uba la buaid khawyiang.
Ïa u shipai BSF uba la thiah lyngktar bad ïa uwei pat u shipai BSF uba don lang la wan shimti noh da ki Pulit jong ka Pasteur Beat House hadien ba la pyntip da ki nongïalam ka HYC bad la pynkit noh sha Hospital na ka bynta ban leh ïa ka Medical Checkup.
Ha ka por janmiet ka HYC ka la aiti ïa ki marbam sha ki bor pynïaid jong ka Alive Again Foundation Rehabilitation Centre kaba don ha ka jylla Assam ban bsa bam ïa ki samla kiba sah ha kane ka Centre hadien ba ki la kut jingmut ban im noh ïa ka jingim kaba thymmai hadien ba ki la shah teh mraw ha ka jingkyrni dih drok.
Kine ki marbam ki dei kiba la ai sngewbha da ki paidbah nongshong shnong ka jylla sha ka HYC ba kan ïarap ïa ka Alive Again Foundation kaba la sumar palat 100 ngut ki samla jong kane ka jylla kiba la ngop ha ka jingkyrni dih drok.
Ïa ki marbam la aiti da u Vice President ka HYC u Bah Donboklang Kharlyngdoh sha u nongpeit jong ka Alive Again Foundation u Bah Arup Passah ha ka jingïalang kaba la lyngkot kaba la long ha ophis treikam jong ka HYC.
