Shillong, K’lyngkot, 09: Ka tnad ka koit ka khiah jong ka Sorkar Jylla lyngba ka Joint Mission Director (JMD) ka National Health Mission ka Dr. N.E Kharsahnoh ha ka sngi Thohdieng ka la khot ïakren ïa ki nongïalam jong ka Meghalaya Asha Worker Union (MAWU) shi sngi hadien ba ki nongtrei ASHA ha ka Jylla ki la sdang ïa ka jingïakhih da kaba sangeh treikam.
Ka jingkhot ïa ki nongïalam jong ka MAWU ka long ban ïakren halor ka jingbym ïoh ki nongtrei ASHA ïa ka jingsiew jong ki la kumba 6 lane 7 bnai.
Ha ka jingïakren bad ki lad pathai khubor, ka President jong ka MAWU ka Kong Mira June Myrsing ka la ong hadien ka jingïakren ka Dr. Kharsahnoh ka la kular ban pyllait noh ïa ka pisa ha ka 24 tarik mynta u bnai.
“Hynrei, ïa mynta ngim pat lah ban shim rai hangne namarba ngi dei tang ki nongïalam hynrei ïa ka rai ngi hap ban shim lang bad ki paradkhot la ngin pynkut noh lane ngin dang bteng ïa ka jingsangeh treikam,” ka la ong.
Ka Kong Myrsing ka la pynshai ruh ba ka jingslem ka rukom pyllait ïa ka jingsiew jong ki nongtrei ASHA ka long na ka daw ka jingwanrah ïa ka rukom siew pisa ha ka system kaba thymmai kaba thud haduh katta katta.
