Shillong, Jymmang 30: Ka Sorkar Jylla ha ka sngi thohdieng ka la kular ban thung da ka jingtohkit halor ki jingkynnoh treikam bymhok, ka jingpynïaid kam bakla jong u Vice Chancellor ka National Law University, Meghalaya (NLUM), Prof Indrajit Dube.
Ha kaba ïadei bad kane u General Secretary ka Khasi Students’ Union (KSU) u samla Donald V Thabah hadien ka jingaiti ïa ka jingujor pyrshah ïa u VC ka NLUM sha ka Myntri ba khmih ïa ka tnad Aiñ Kong Ampareen Lyngdoh.
U la ong, “ka kong Ampareen ka la pan 2 bnai ka por ban pynlong ïa ka jingtohkit bad ban sa aiti ïa ki jingshem sha ka Governing Council bad ka Executive Committee jong ka University, kiba kynthup ïa ki Judge ka High Court ba kin shong bishar ïa baroh ki jingujor.”
Haba kren sha ki lad pathai khubor u Bah Thabah u la ong, “Ha ka jingshisha ngi dawa ban wengkam noh ïa u Vice Chancellor hynrei la ïohi ba ki don katto katne ki jingeh halor ka jingweng kam ïa u tangba ki la kular ba kin sa aiti ïa ki jingshem jong ka jingtohkit sha ka Finance Committee bad ka Executive Committee ba kin sa leh eiei halor kane.”
Ïa ka jingujor ba la mudui da ka KSU la pynshong nongrim katkum ki jingshem RTI ba kynnoh ïa ka jingpyndonkam bakla kaba jur ïa ka pisa da u Vice Chancellor nalor shibun ki jingleh bym hok ha ka thungkam thungjam ha kane ka skulbah.
“Ha ka 25 tarik Rymphang, 2025, ka seng ka la phah ïa ki jingthoh shaphang ki jingleh bym hok ha ka jingthungkam thungjam sha kiba bun ki dkhot jong ka Governing Council ka NLUM kiba ki dkhot ki kynthup ïa ki Judge ka Meghalaya High Court, ki ophisar na ka Sorkar Jylla, u Vice Chancellor bad kiwei kiwei ki kynhun, ha kaba ha ka jingïalang jong ka General Council ba long ha ka 26 tarik Rymphang, 2025, ka la ïakren ïa kane ka kam bad la shim rai bad ai jingbthah ruh ïa u Vice Chancellor hynrei sngewsih ba u Vice Chancellor u khlem leh eiei ban pynbeit ïa ki jingleh bakla ïa kaba la ïoh jingtip da ka seng hadien ba ïoh ïa ka jubab na ka RTI,” bynrap u samla Donald.
U la ong, “U Prof Indrajit Dube ula pynïaid donbor ïa ka NLUM, thung ïa ki nongtrei kat kiba ïajan bad u bad kyntait ïa ki trai riewlum kiba lah ban trei ïa ka kam bad um don jingkwah ruh ba ka NLUM kan kiew hynrei u pyrkhat tang ïa ki jingmyntoi shimet,” ula ong haba bynrap, “Katto katne na kiba la shah thungkam kum ki nonghikai ruh ki dei kiba la thung jied namar ki dei ki bahaïing hasem jong ki Heh Ophisar ka Jylla.”
Na ka liang ka KSU ka la kynnoh ruh ba u Prof Indrajit Dube u ju leit man ka por sha Delhi, Kolkata bad kiwei ki bynta jong ka Ri da ka pynlut na ka pla tyngka jong ka University bad bynrap ba wat ka jingleit jong u kum u VC ne na ka bynta ki kam ka University ruh kim shym la don satia ïa ki kot ki sla ban pynshisha kum ki shithi shah khot sngewbha lane kino kino ki kot ki sla kiba biang.
Ka seng ka la ong ba ka RTI ka la shem ba naduh ba sdang treikam ka NLUM ha u 2023, u Prof Indrajit Dube ula pynlut haduh T.15.10 lak ha ka kam leit jingleit jong u ba kynthup ïa ka jingthied tiket liengsuiñ, jaka sah, ka bam bad kiwei kiwei, ïa kaba bun la ikop kum ka jingleit shimet, kumta ka dei ka jingpynsyrwa kai ïa ka pisa ka Sorkar ne paidbah na ka bynta ka jingmyntoi shimet jong u.
Haba ong ba u Vice Chancellor u don hok ban ïoh ïa ka medical reimbursement ne ka jingpynphai ïa ka jinglut ba leit sumar bad haba leit jingleit bad jaka tang na ka bynta ki kam ka University, u nongïalam ka seng u la ong ba ka la ïoh lum ïa ki spah tylli ki receipt ba u pynlut ha ka bam, kaba kot da ki lak tyngka.
“Ka seng kam sngew eiei ïa ka jingpynlut ha ka bam namar ka long kaba donkam hynrei katkum ki receipt ba la ïoh, ka pyni ba u Prof Indrajit ula pynlut sahuh ha ki jingbam ha ki restaurant kiba rem dor, ki coffee na ‘Starbuck’ bad kiwei kiwei bad ïa ka bill pat la hap ban siew da ka Sorkar Jylla,” bynrap u Bah Thabah.
Ka seng ka kdew ruh ba katkum ka RTI, ka NLUM ka la pynlong ïa ka jingïalang “Climate Investment Coalition for the Global South’ ha ka 20 tarik Rymphang, 2025 ha Delhi bad ka mang tyngka baroh ba la mang ïa kane ka prokram la buh T. 25 lak.
“Ka Seng kam don jingsngew haba ïadei bad ka prokram bad ki jingpynlut ïa ka hynrei ka pynrem pat ba ïa ka pisa ka Sorkar la pyndonkam ha ka jingïadih kyaid sadhai. Katkum ka bill, la shem ba ka pisa ba T.3,56,750 la pynlut ha ka kyiad da u Prof Indrajit ha kane ka prokram. Kane ka dei ka jingpyndonkam bakla ïa ka pisa bad ïa kum kane ka jingpynsyrwa kai ïa ka pisa dei ban siew da ma u sha ka Sorkar Jylla,” u la ong.
U Nongïalam ka KSU u la kynnoh ruh ïa ka jingthungkam beaiñ bad siew tulop beaiñ da u Vice Chancellor sha u Prof. of Practice, Prof. of in Residence, Associate Professor in Residence, Research Fellow, Post-Doctoral Fellow bad kiwei kiwei.
La kynnoh ba u Prof Indrajit dalade, ula shna hi ïa ka First Statutes, 2023 bad aibor halade ban thungkam ïa kino kino ki briew khlem da ïaid katkum ka lynti hynrei tang da ka mon jong u, kaba la ailad ïa u ban pyndonkam bakla ïa ka bor ban ïoh leh ïa ki kam thok kam shukor.
Ka seng ka kynnoh ba u Prof Indrajit u la thungkam haduh 6 ngut ki kynthup ba kynthup ïa 3 ngut ki Prof. of Practice, 1 (uwei) Associate Prof. in Residence bad 2 ngut ki Prof. in Residence halor ki jingshemphang jong ki ha ki laiñ bapher bapher ki ban ïarap ïa ki samla pule. Kat kum ka RTI, kine ki briew ki hap ban ai jinghikai haduh 20 kynta ha ka shibnai la ka dei markhmat ne na shajngai hynrei ka Seng kala shem ba naduh ba u rungkam, napdeng ki 6 ngut, tang 2 ngut ki professor ula shim klas kata ruh kaba long haduh ka por ba la buh bad 4 ngut kim pat ju shim klas satia ha kane ka jaka pule.
“Hynrei ki professor ki la sei ïa ka tulop bad kiwei kiwei ki jingmyntoi khlem da synniang eiei sha ki samla pule. Ki 3 ngut ki Prof. of Practice ba la thung da u Prof. Indrajit Dube naduh u Nailur, 2023 kila wanrah ïa ka jingpynlut ba kot haduh T. 46,83,500 kum ka tulop/honorarium ka kot T. 1,50,000/- shibnai bad T. 8,26,301 kum ka baileit baiwan bad kiwei ki jingpynlut kata ruh khlem da wan shim klas ne ai jinghikai ïa ki samla pule,” la ïathuh ka seng.
U Bah Donald u la ong, “Kane ka dei ka kam bamsap kaba la shai kdew bad ka jingpyndonkam bakla ïa ki samla pule bad ïa ka spah ka Jylla ïa kaba ym lah ban shu ieh khlem ka jingpynsajia.”
