Shillong, Kyllalyngkot, 16: Ka Hynñiewtrep National Youth Front (HNYF) South East, Sohra Circle ha ka sngi Thohdieng ki la leit ban ïa kynduh ïa u Register Officer jong ka National Institute of Technology (NIT), Sohra ban dawa ba dei ban weng noh ïa ka North East Security Service Private Limited (NESSPL) kaba dei ka Agency kaba ïoh ban pynïaid ïa ka kam pahara ha NIT, Sohra hadien ba ka la pyndonkam bakla ïa ka Trading License ba ai da ka Khasi Hills Autonomous District Council (KHADC).
Haba kren sha ki lad pathai khubor, u nongaiktien ka seng u Bah Banjop Khongwir u la ong, “lada ka NESSPL ka la shah pynduh bad shah weng noh na ka NIT ki Security Guard lane ki nongap pahara kim dei ban duh ïa ka bainong kaba ki la trei kum ki nongap pahara jong ki mynta u bnai Kyllalyngkot.”
Nalor kata u la ong ba ka seng ka la ïakren ruh ha kaba ïadei bad ka jingbym pan ïa ka No Objection Certificate (NoC) da ka NESSPL na u Sordar ka Elaka Saitsohpen bad halor ka jingpyndonkam bakla ïa ka Trading License ba la ïoh na ka KHADC.
U la ong ba u Register Officer ka NIT, Sohra u la pyntip ba ka NESSPL kam shym la aiti ïa ka kopi jong ka Trading License hynrei ka la ai tang da ka syrnot ba la ai da ka KHADC bad ïoh ban pynïaid kam ha NIT, Sohra.
“Ka seng ka kren da kaba shai ïa ka Khasi Hills Autonomous District Council ba lada ka ai certificate ka dei ban da kdew ruh ïa ki jaka bad ïa ki kyrteng ïa kino kino ki kompeni kiba wan nabar ban trei ha ki jaka ba dan hap hapoh ka Schedule Area,” u la ong.
U la ïathuh ba u Register Officer ka NIT u la pyntip sha ka seng ba ka NIT kan sa bishar bniah ïa ki kot ki sla jong ka NESSPL bad lada kam biang ka jubab kumba la ïoh na ka District Council kan sa kyndang noh ïa ka Agency.
