Shillong, Risaw, 16: Ka Sorkar Jylla ha ka sngi Palei ka la kular ban ai jingïada ïa ka kam jong ki 14 hajar ngut tam ki nonghikai skul SSA kiba don ha ka jylla baroh kawei.
Ïa kane la pyntip da u President ka Meghalaya SSA School Association (MSSASA) u Bah Aristotle C. Rymbai ha ka jingïakren bad ki lad pathai khubor hadien ba la wai ka jingïalang ba la pynïaid da u Myntri Rangbah ka Jylla u Conrad K. Sangma ryngkat ka jingdonlang u Myntri ka tnat Pule Puthi u Bah Lahkmen Rymbui, u Commissioner and Secretary u Vijay Kumar Mantri, u Director ka State Education and Literary u Bah Banteilang Kharshandi, heh ophisar ka tnat Pule Puthi bad ki nongïalam jong ki nonghikai skul SSA ba kynthup ïa ka Meghalaya SSA School Association (MSSASA), ka All Meghalaya SSA School Teachers Association (AMSSASTA) bad ka All Meghalaya Fourth Teachers’ Association (AMFTA).
“U Myntri Rangbah u la kren da kaba shai ba ka Sorkar kan ïada ïa ka hok jong ki nonghikai skul SSA ha baroh kawei ka jylla Meghalaya,” ong u Bah Rymbai.
“Kumba phi tip ba ka skhim Samagra Shiksha Abhiyan kan sa kut noh ha ka 31 tarik, Lber, 2026, ngi sngewkmen ba mynta ka sngi ka Sorkar ka la kular ban ai jingïada ïa ka kam jong ngi ki nonghikai skul SSA,” u la bynrap.
Ha kaba ïadei bad ka jingdawa jong ki nonghikai skul SSA ban pynkiew tulop, u Bah Rymbai u la ïathuh ba u Myntri Rangbah u la kular ban wanrah da ka rukom siew tulop kaba thymmai na ka bynta ki nonghikai skul SSA bad kynthup ruh ïa ki nonghikai 4th Teacher.
Haba kylli, u la ong, “ngi sngewkmen ba ka jingïakren ha ka jingïalang ka la long kaba seisoh. Ngin sa pyntip ïa baroh ki jingïakren ha ka jingïalang paidbah jong ki nonghikai skul SSA tang shu ïoh pdiang ïa ka thup buh jingthoh na ka jingïalang kaba la long mynta ka sngi.”
Kum ban shu pyntip, 3,334 hajar tylli ki skul SSA ha Meghalaya ki la aiti ïa ka No Objection Certificates (NOC) ban aiti noh ïa ka Management sha ka Sorkar Jylla, na ki 5,131 hajar tylli ki skul SSA kiba don hapoh ka jylla.
298 tylli ki dei ki skul ba pynïaid da ki Balang bad ki kynhun shimet kiba la mynjur ban aiti sha ka Sorkar.
