Shillong, Risaw, 02: U MDC ka Sohra Constituency u Bah Titostarwell Chyne ha ka sngi Balang u la leit ai mynsiem ia ki nonghikai skul SSA kiba don hapoh ka shatri jong ka All Meghalaya SSA School Teacher’s Association (AMSSASTA) kiba la sdang ia ka jingiakhih ba khlem pud sngi ha Madan Malki, Shillong naduh ka sngi Baar.
Ha ka jingiakren bad ki lad pathai khubor, u Bah Chyne ryngkat ka jingsynran lang jong u dkhot ka UDP u Bah Robertjune Kharjahrin u la ong, “haba nga ïohsngew ba ka don jingiakhih, nga sngewkhia ban ïohi ba ki nonghikai kin mih sha surok, ka ktah bha ia ngi kum ki nongmihkhmat.”
“Hadien ba ngi la iasyllok bad ki (nongialam ka AMSSASTA) ngi sngewthuh ba ka jingdawa ka long kaba shongnia bad kaba dei ruh ba kin ïoh. Ngi sngewthuh ba ka Sorkar Jylla ka dei ban don ia ka jingkitkhlieh watla ka long ka jingkit kaba khia. Hynrei na ka liang jong ka UDP ngin sa pynsngew ha ka Sorkar ba ka dei ban shimkhia ban leh eiei bad lada kam lah (ban kyntiew ia ka jingsiew tulop) kaba shi spah persen hynrei ka dei ban don ha ka miej jingiakren.”
“Nga kyrpad ia ki nongialam jong ka Association lada ka Sorkar ka khot sha ka miej jingiakren pynbeit, kata hi ka dei ka lynti ba ngin kynjoh sha ka thong. Ki jingeh kin don beit hynrei ka kamram jong ngi kum ki nongialam ka long kumno ban wad ia ka lynti kaba bha tam,” u la ong.
“Ngi sngewthuh ba ka skhim SSA kam dei ka skhim jong ka Sorkar Jylla hynrei ha ka por ba ka Sorkar India ka la wanrah ia kane ka skhim hapoh ka jylla jong ngi ka la long ka jingkyrkhu ia ki shnong ki bym don skul ban ïoh skul, ki bym iing skul ki la ïoh iing skul, ki bym don nonghikai ki la ïoh nonghikai,” ul a ong.
Haba maham ia ka Sorkar Meghalaya ban da bishar bniah bin pa bin shwa ban pdiang ia ki skhim jong ka Sorkar India, u Bah Chyne u la ong, “kane ka dei ban ai jinghikai ia ka Sorkar Jylla ba nangne shakhmat ka dei ban da peit bniah ia kino kino ki skhim ba la ai da ka Sorkar India namarba ngi lah mad ha ki snem kiba mynshwa ha ka por jong ka Operation Blackboard (OB) ha kaba la seng ia ki skul ha ka kyrdan Lower Primary bad ha kaba khatduh ka la poi ka por ba ka Sorkar India ka la sangeh noh ban mang pisa na ka bynta kane ka skhim.”
“Kumjuh ruh ia ka skhim SSA, kane kan dei ka jingma kaba khraw lada jia ba ka Sorkar India ka pynsangeh noh kan long ka jingban khia kaba jur ia ka Sorkar Meghalaya. Na kata ka daw ka Sorkar Meghalaya ka dei ban da pyrkhat khia bha nangne shakhmat haba kum kine ki jait skhim ki wan ha kane ka jylla,” u la ong shuh shuh.
“Kat ki nonghikai ha kane ka juk mynta ban im ia ka tulop kaba tang 20 hajar tyngka shi bnai kam long kaba suk na ka bynta jong ki,” kren diaw u Bah Chyne bad bynrap, “ki (nonghikai skul SSA) dei ban ïoh ia ki jingsiew kiba biang namarba ki la noh ia u synñiang sha u sup u thiar jong ka pule puthi ha ka imlang ka sahlang, naba kim ïoh ia kiwei pat ki jingmyntoi.”
“Kumba ngi tip, ka tnat Pule Puthi ka don ia ki jingeh jong ki nonghikai skul Adhoc, ki nonghikai SSA bad kumta ter ter bad kumba ka Sorkar ka la buh thong ban kham phaikhmat ban kyntiew ia ka tnat Pule Puthi, ka ladei ban kham shimkhia shuh shuh ban thawlad kumno ba ki nonghikai kin ïoh ia ka hok jong ki,”la kyrpad u Bah Chyne.
U la kyrpad ruh ia ka Sorkar ba kan thawlad ban pynurlong ia ka jingdawa jong kine ki nonghikai skul SSA khnang ba kan ym long ka jingduhnoh ia ki khynnah skul na ka jingiakhih ba khlem pud sngi jong ki nonghikai.
