Shillong, Ïaïong 15: U MP ka Rajya Sabha na Meghalaya u Dr WR Kharlukhi ha ka sngi Baar u la kular ban sa pynsngew sha ki tyndong shkor jong ka Sorkar India halor ka jingdonkam ban pyntreikam ïa ka jingthungkam kaba 80-20 ratio ïa ki kynthei bad shynrang ha North Eastern Indira Gandhi Regional Institute of Health & Medical Sciences (NEIGRIHMS) ha ka jingthungkam Nurse.
Ha ka jingïakren bad ki lad pathai khubor hadien ka jingïakynduh ïa ki nongïalam ka Hynñiewtrep Youth Council (HYC), u Dr Kharlukhi u la ong, “nga la ong ïa ki ban ngan sa ïakynduh ïa ki lai ngut ki MP bad pyrshang ban rah ïa kane sha ka Sorkar Pdeng.”
“Ka mat kaba ki la wanrah ka dei shaphang ka polisi thungkam thungjam ha NEIGRIHMS. Wat ha AIIMS ruh ki leh ïa ka 80:20 female-male ratio bad kiwei kiwei ki medical college ruh ki leh ïa kata bad ngin sa ra ïa kane ka kam (sha ka Sorkar Pdeng)” u la ong.
Shwa kane, u President ka HYC Bah Roy Kupar Synrem u la ong ba ka seng ka la kyrpad ïa ka jingtuklar jong u MP ka Rajya Sabha ban rah ïa kane ka mat sha ka Health Ministry khnang ban pyntreikam pura ïa ka 80:20 female-male ratio ha ka jingthungkam Nurse ha NEIGRIHMS.
“Ngi kwah ba un rah ïa kane ka mat sha ka Ministry. Namarba u dei u nongmihkhmat na ka party kaba dei ka paralok kaba ïatreilang hapoh ka Sorkar NDA ha Delhi, ngi kwah ban pynkhamti ha u ïa ka jingkitkhlieh ha ka kyrteng jong ki nongshong shnong ka jylla. Lada ka AIIMS ka lah ban pyntreikam ïa ka 80:20 female-male ratio, balei ka NEIGRIHMS kam lah ban pyntreikam kum ïa kata ka polisi,” ong u Bah Synrem.
“Ngi la aiti lut ïa baroh ki kot ki sla da ka jingkyrpad ïa u MP ba un shimkhia bha ïa kane ka mat khnang ba kan ym ktah ïa ka jinglong jingman ha NEIGRIHMS ha kaba ïadei bad ka jingthungkam Nurse. U la kular ka jingïakynduh bad ngi, ba un sa pyrshang ban shimkhia bha ïa kine ki mat,” la bynrap u Bah Synrem.
Ka HYC ka la ïakhih ïa kane ka mat thungkam hadien ba ka NEIGRIHMS lyngba ka Advertisement ba la pynmih ha ka 22 tarik, Kyllalyngkot, 2025 ka la pynbna ban pyndap ïa ki 105 tylli ki posts Nursing Officers hynrei ha ka Advertisement kam shym la kdew ïa ka ratio thungkam Nurse la long ïa ki kynthei ne shynrang.
U Bah Synrem u la ong ba ka NEIGRIHMS ka la thoh sha ka Ministry of Health & Family Welfare ha ka 9 tarik, Naitung, 2024 ban pan jingmynjur na ka Ministry ba kan pyntreikam ïa ka kyndon kaba thungkam 80:20 ration ïa ki kynthei. Ïa ki nurse shynrang la pdiang da ka Central Institute Body of AIIMS, New Delhi bad kiwei kiwei ki Institute ne Undertaking jong ka Sorkar India kum ka ESIC Hospital kynthup ruh ïa ka Institute of National Importance kum ka JIPMER ha kaba 80% na ki kam Nursing Officers la mang kyrpang tang ïa ki kynthei.
Hynrei ka Ministry lyngba ka shithi kaba la pynmih ha ka 08-08-2024 ka la jubab, “la ai jingmut ïa ka NEIGRIHMS ban ym pdiang ïa ka kyndon thungkam 80:20 (kynthei: shynrang) Nurse kumba la pdiang da ka AIIMS, NEW Delhi.”
“Kane ka jingai jingmut jong ka Ministry kam shym la ktah tang ïa ka treikam treijam jong ka NEIGRIHMS hynrei ka la ktah ruh wat ïa ka jingsngew jong ki nongpang kiba leit wad jingsumar ha NEIGRIHMS Hospital,” la ong u Bah Synrem.
Katkum ka jingong jong u, ka NEIGRIHMS ka don kumba 40 tylli ki department bapher bapher ha kaba ki Nursing Officer ki hap ban trei bad tang 3 tylli na kine ki department ki dei ki Male Ward.
