Shillong, Jylliew, 11: U Myntri ka tnat Jngohkai Pyrthei ka Sorkar Jylla u Bah Paul Lyngdoh ha ka sngi Balang u la kular ban pynshna da ka rynsan die jingdie hajan ka jingkieng Duwan Sing Syiem kaba don ha ka shnong Mawkdok na ka bynta ki nongdie jingbam harud surok kiba ju im kamai jakpoh da kaba die soh, die tiar manla ka sngi sha ki nongjngohkai pyrthei kiba ju sangeh ha kane ka jaka ynda ki leit bad wan phai na ki jaka jngohkai pyrthei bapher bapher kiba don ha ka thaiñ Sohra.
Kane ka jingkular ka long hadien ba u Bah Paul u la hiar hi dalade ha jingkieng Mawdkok ban ïakynduh markhmat bad ki nongdie jingdie kiba dei ki trai shnong ka shnong Mawkdok kiba kumba 20 ngut.
Da dalade hi u Bah Paul u la phah lum jingkheiñ ïa ka jingdon jong ki nongdie jingdie kiba don ha kane ka jaka ha kaba u la bthah ba kin phah ïa ka jingthoh sha ka tnat Jngohkai Pyrthei ba kan dup lah ban mang pisa na ka bynta ban pynshna ïa ka rynsan die jingdie.
Kane ka jingkular, ka long hadien ka jingshimkhia bad ka jingpynsngew da u MDC ka Sohra Constituency u Bah Titostarwell Chyne ban pyllait ïa ki nongdie madan na kino kino ki jingjia ba sngewsih kiba ju die jingdie harud surok.
