Shillong, Nailur, 30: U Myntri Rangbah ka Jylla u Conrad K. Sangma u la pynskhem ba ka Sorkar Meghalaya Democratic Alliance (MDA-II) ka pyrshah ïa ka jingtih Uranium ha Meghalaya.
U Myntri Rangbah u la pynthikna ha ka sngi Baar ban ïakren bad ka Sorkar Pdeng ha kaba ïadei bad ka Office Memorandum ba la pynmih dang shen ha ka 8 tarik mynta u bnai da ka Ministry of Environment, Forest and Climate Change (MoEFCC) ynda ladep bishar ïa ki bynta aiñ jong ka.
Ka Office Memorandum, ka kaba tyrwa ban ym pynlong ïa ki jingïamir jingmut bad ki jingpynsngew paidbah na ka bynta ki projek tih marpoh khyndew kum u Uranium, ka la pynmih ïa ka jingsngewkhia na ki nongshong shnong ka jylla, namar kine ki rukom treikam ki dei ki bynta ba kongsan jong ka Environmental Impact Assessment (EIA)
“Kum ka Sorkar ngi la pynpaw shai bha ïa ka nongrim ba ngi ieng bad ba ki paidbah jong ngi bad kum ki kynhun bad wat kum ka Sorkar ba ngim kyrshan ban tih Uranium. Ngi la kren shai bha halor kata bad ngi la pynpaw ïa kane da kaba shai bha bad nga kren shai ruh ïa kata mynta,” ong u Sangma ha ki lad pathai khubor ha ka sngi Bar.
U Myntri Rangbah u la pynpaw ïa ka jingsngewkhia kaba jur halor ka jingpynbna da kaba ong ba watla um pat ïoh ban bishar bniah hynrei kane ka kam ka donkam ban bishar bin pa bin da ka aiñ.
“Da kaba pynshong nongrim na kaei kaba ngi ïohi, ngin sa pan jingshai na ka Sorkar India bad katba donkam ngan sa rah ïa kane ka kam sha ka Sorkar India ha ki kyrdan bapher bapher bad ban pynthikna ba ïa ka jingmyntoi jong ki paidbah jong ngi yn ïada,” u la pynthikna.
“Namarkata ka dei ka jingkitkhlieh jong ka Sorkar bad lada ngi lap hangno hangno ba ka don kano kano ka aiñ kyrpang ne kano kano ka jingpynbna kyrpang kaba ïaid pyrshah ïa ka jingmyntoi jong ki paidbah jong ngi, ka dei ka kamram jong ka Sorkar ban rah ïa kane ka kam sha ka Sorkar Pdeng bad nga pynthikna ïa ki paidbah ka jylla ba ngin ieng ryngkat bad ki paidbah halor kane ka mat bad ngin sa shim ïa ka jingktah jong ka bad ynda ngi la shai, ngin sa leit sha Delhi bad lada donkam ngin sa shim ïa kane ka kam ha ka kyrdan kaba ha khlieh duh,” la bynrap shuh shuh u Sangma.
