Shillong, Nohprah, 06: U Bah Reachingson Siangshai uba long u nongwad RTI ha ka sngi Saitjaiñ u la leit jurip kum u nongpeit pyrman ïa ki samla wadkam kiba dang thoh eksamin na ka bynta ka post Medical Officer (Homoeopathy) ba la pynlong da ka ophis u District Medical & Health Officer (DM&HO) East Jaiñtia Hills District hapoh ka Jaiñtia Eastern College, East Jaiñtia Hills District ban pyntikna ba kam ym don ka jingleh tuh hapoh ka Examination Hall da ki nongthoh eksamin.
U Bah Siangshai u la leit jngoh ha baroh ar tylli ki Hall bad u la ong ba ïa mynta u la ïohi ba ka rukom pynïaid ka long kaba biang bad u la kyntu ruh ïa ki nongap eksamin ba kin nym ailad ïa ki nongthoh eksamin ba kin leh thok da kano kano ka lynti.
U la ong ruh ba da leilei un ym ailad ïa ka District Selection Committee (DSC) lane ïa ki tnat treikam ka Srokar kiba pynlong ïa ki eksamin thungkam hapoh ka District ba kin leh katba ki mon.
U la kyntu ruh ïa ki paradoh parasnam ka East Jaiñtia Hills District khamtam ïa ki samla kiba applai ïa kino kino ki post ba kin trei shitom bha khnang ba kin lah ban ïoh ïa u soh uba thiang lyngba ki jingtrei shitom jong ki.
Kane ka jingleit jurip jong u Bah Siangshai ka long hadien ba u Deputy Commissioner ka East Jaiñtia Hills District dang shen u la khot pynlong ïa ka jingïalang na ka bynta ban pynjanai ïa ka rukom pynlong ïa ki eksamin thungkam hapoh ka District.
