Kumba 500 tam ki mynsiem la pynim ka Blood Bank Nongstoiñ

Shillong, Naitung, 14: Ka West Khasi Hills Blood Donors Organisation kaba dei ka tnad jong ka Ai Jingim VBDO Shillong hapoh ka jingïalam jong u President u Bah Lumlang Kharsyiemlieh bad ka General Secretary ka Kong Medaris Lyngdoh ha ka  Lah Sngi u Blei ka la pynlong ïa ka jingnoh synniang da kaba ai snam hapoh Civil Hospital Nongstoiñ.

Ha shuwa ban sdang ka jingaisnam la pynlong ïa ka jingïalang ba lyngkot ha kaba la ïadon lang ruh u Dr. Eric Wanniang uba la long kum u Kongsan, ki dkhot ka Ai Jingim bad kiwei kiwei.

U Dr. Eric Wanniang haba ai jingkren kum u kongsan u la ong ba ka Civil Hospital Nongstoiñ lyngba ka Blood Bank ka la ïoh ban shakri kumba 500 tam ki mynsiem briew kiba donkam kyrkieh ïa ka snam bad u la ong ba ka long kaba donkam eh ban synniang ïa la ka snam sha ka Blood Bank ban pynim ïa ki mynsiem briew namarba kam ktah ïa ka jingkoit jingkhiah jong ka met.

Ha kane ka sngi ki la don da ki phew ngut kiba la mih shakhmat ban synniang ïa la ka jong ka  snam bad kumjuh ki dkhot jong ka West Khasi Hills Blood Donors Organisation.