Shillong, K’lyngkot, 08: Ka Congress party ka la ïoh pdiang ïa ki aplikeshon na kumba 70 ngut ki kyrtong kiba pan tiket na ka bynta ban ïakhun ïa ka elekshon jong ka Garo Hills Autonomous District Council ka ban sa long shen mynta u snem.
Ha ka jingïakren bad ki lad pathai khubor ha ka sngi Palei, u President ka Meghalaya Pradesh Congress Committee (MPCC) u Bah Vincent H. Pala u la ïathuh ba ka party ka long kaba la pynkhreh ban ïakhun ïa ka elekshon jong ka GHADC.
U Bah Pala u la ïathuh ba ka party kan sa shim rai ban ai tiket ïa ki kyrtong tang shu pynbna ïa ka tarik ban pynlong ïa ka elekshon.
“Na ka bynta ka elekshon ha GHADC, ngi ladep khot aplikeshon naduh u bnai baladep. Ki don kumba 70 ngut kiba wan shakhmat ban pan tiket bad ngin sa shim rai halor kane,” la ong u Bah Pala.
Shuh shuh u la ong ba ka party ka la shim rai ban pynbna ïa ka jingai tiket sah ki kyrtong tang shu pynbna ïa ka tarik pynlong elekshon.
“Kumba ju long hi ka rukom, ki tang shu pynbna ïa ka elekshon, ngi ruh ngi ju pynbna ïa ka kyrteng jong ki kyrtong. Ngi la pynkhreh bha nadong shadong,” la bynrap shuh shuh u Bah Pala.
