BABU KULAR KHONGJIREM
Ki riew sainpyrthei mynshwa bad kiba mynta ki ïapher shisha bak-ly-bak kumba ïapher ka bneng bad ka khyndew.
Mynshwa, ki riewsainhima ki da dei shisha kiba la kha ïa ki ban long ki nongsynshar lem ïa ki paidbah (they are borne politicians). Hynrei mynta pat, ki dei tang ki politician shu thaw (today, politicians are made not borne). Ki politician mynta kiba la ithamula bad i ngiah hi shoiñ ban peit. Kim don shuh ka raiñ ka rem. Kim don nongrim wat tang shi dana ruh (politicians without principles) hynrei kmang tang ban ïoh shim kabu (just to take advantages) ïa ka kam shakri paidbah (political positions/ranks).
Hato, ka kam shakri paidbah ka long kaba kyntang seh mynta? Ka kam shakri paidbah ka la pynhiar dor badpyntad dor shikatdei eh. Ha ka jaka ban ïohnam ïoh burom, ka pynbudnam pynban ïa ki bad ïa ka iing ka sem jong ki wat hadien habud ruh. Ka jingmih khubor ba lai (3) ngut ki MLA jong ka seng Congres ki ryngkoh ne ryngkang kper noh sha kawei pat ka kper kaba ki nang mut kaba itynnad bad kaba suk ba kmen ïa ki, hynrei kam dei satia kumta kumba jia ha ka kper Eden hyndai.
Lada ki pyrkhat pat ba ka dei ka kper Eden ruh, hynrei u bseiñ ne u soitan uba triem bha un don beit ban phoi ban pah kumba jia ha ka khana jong u Adam bad ka Eve (Im) ha ka kper Eden hyndai.
Kine ki MLA mynta, i kumba ki ïalehkai Ludo pynban. Ka jingishongshit bad i phuhmut- phuhmat jong ki ka bym don thylliej ne bym lah batai shuh.
Hynrei, to tip ba ki ïoh kiew jingkieng kumba ïoh kiew jingkieng ha ka jingïalehkai Ludo. Kim tip pat ba hadien pat, ki lah pat ban shah nguid bseiñ khamakha ban poi sha trai duh ha ka kyrdan longriew man briew.
Lada ki haram shisha ïa ka seng Congress kaba ri bad sumar kum ka kmie jong ki ban pynjop donburom ïa ki,kata, kin sa jot bad kordit pat hadien habud namar ka phawer ka ong, “Kordit ïa ki khun kiba haram ïa la ki kmie ki kpa” bad ka ktien ka ong ruh ba, “Ki khun tam sneng ki dei ki nongshun ba sniew tam jong u briew”. Ka ktien ka la maham lypa ba “Ka nongkylliang kaba kham sniew ka la ap lypa ban snoh ha piew (ka nongkylliang kaba kham sniew bad kham shyrkhei kan wan hadien” Ka kyntien ka ong ba “Ka nongkylliang kan wan beit khlem pep lada phi leh ïa kaba bha ne kaba sniew ruh”.
Ki khasi hyndai ki ju ong ruh, “Kiba pynkheiñ jutang ne kiba pynkheiñ ïa ka juban lak (ka ktien ba ki khlei hok mynshwa) kan sa bishar bad ngat kylla hi ha ka hok ne ka ktien la jong.”
Lada jia ba kata ka ktien Hok ka bishar ïano ïano, ki ong, ym don dawai shuh ha pyrthei ban pynkoit ïa ki. Na ka jinglalot, kan sa poi sha ka lanot. Kan sa poi ka por te, ba ‘uba rkhiebnyngkong, un ïam khadduh’. Kumta kein kan sa jia ïa kiba na ka jingkmen kiew jingkieng, kan sa poi ka por sa sha ka shah nguid bseiñ syndon jlang sha trai’.
