Shillong, K’lyngkot, 27: U Kyrtong jong ka National Peoples Party (NPP) u Bah Fantin Joseph Lakadong ryngkat ka jingsynran lang ka kurim ka Dr. Ampareen Lyngdoh kaba long ruh ka MLA jong ka East Shillong Constituency bad ka Myntri ka Sorkar Jylla lem bad ki bahaing hasem bad ki nongkyrshan ha ka Lah Sngi u Blei u la leit ban thep kyrteng na ka bynta ban aireng ïa ka elekshon MDC na Malki-Laiumkhrah Constituency sha ka Ingdorbar Thawain ka Khasi Hills Autonomous District Council ka ban sa long ha ka 21 tarik Rymphang, 2025.
Ha ka jingïakren bad ki lad pathai khubor hadien ba ladep ban thep kyrteng ha ISBT Mawiongrim, u Bah Fantin u la pynpaw ka jingsngewskhem ba mynta ka kynti ruh un dang ïoh ïa ka jingjop kumba ki paidbah jong ka Malki-Laiumkhrah Constituency kumba ki la pynjop donburom ïa u ha ka elekshon MDC kaba la long ha u snem 2019.
Ka Dr. Ampareen haba bynrap ka la ong ba ka dang shaniah ïa ki paidbah jong ka Malki-Laitumkhrah Constituency kumba ki ju ai jingkyrshan ruh ïa ka ha ki elekshon jong ki snem baladep.
U Bah Fantin un long u kyrtong ba nyngkong eh jong ka NPP ban thep kyrteng ha kane ka sngi.
