Khliehriat, Nailur 15: Arngut ki snar khaii drok ia kiba la tip kyrteng kum u Lorence Zomuanpuia, 32 snem uba sah ha Assam Bazar, ARC, Shillong bad u Lalmalsawa, 36 snem uba sah ha Hunthar veng, Aizawl, Mizoram ki la shah kem ha ki Pulit jong ka East Jaiñtia Hills District halor ka jingdonkti ban wanrah be-aiñ ia u drok sha kane ka jylla Meghalaya.
U Kyrwoh ba la phah da u Superintendent of Police ka East Jaiñtia Hills u Jagpal Singh Dhanoa u la iathuh, ha ka step sngi thohdieng ki Pulit ki la ioh ia ka jingtip kaba bniah na ki tnat syntiat ba ki ar tylli ki kali Tourist kiba wan na Mizoram ki la kit ia ki tiar khaii be-aiñ.
Mar mar, ki Pulit ka kynhun Anti-Narcotic Task Force (ANTF) ryngkat bad ki Pulit jong ka Umtyra Check gate bad ka Khliehriat Police Station ki la pynlong ka jingtalasi ia ki kali ha ka shnong Nongsning hapoh ka jingialam jong u Addl. Superintendent of Police jong ka East Jaintia Hills u Bah Banraplang Jyrwa.
U SP u la iathuh, dei ha ka por kumba 8:30 baje mynstep ki Pulit ki la bat ar tylli ki kali. Ha ka jingtalasi ia ka kali banyngkong (Tata Sumo ML-05-M-1597) ha ryngkat ka jingdonlang ki nongsakhi, la lap saw tylli ki synduk thep sabon ba la thep ia u powdar rong stem uba khia 43.33 gm, bad ha ka jingtalasi sa ia ka kali kaba ar (Tata Sumo MZ-01-K-3872), la ioh kurup 44 tylli ki synduk thep sabon ba la thep ia u powdar rong soh uba don ka jingkhia kaba 516.43 gm, haba khein lang u drok ba lah ioh kurup mynta ka step u long 559.76 gms
Ha ka jingtohkit bad eksamin la pynshisha ba u powdar u dei u drok heroin. Ia u drok ba la ioh kurup la song bad la kurup hakhmat ki nongsakhi.
Ki Pulit ki la ioh kurup ruh T. 2,200 ka pisa bad ar tylli ki mobile phone.
Ha kaba iadei bad kane, ki Pulit ki la register case hapoh ki kyndon jong ka NDPS Act ha Khliehriat Police Station bad ka jingtohkit halor kane ka dang iaid shakhmat ban lap ksai sa ia kiwei pat kiba donkti lang ban pynpoi ia u drok sha kane ka jylla.
