Shillong, Naitung, 15: Da kaba pyntreikam ïa ka hukum ba la pynmih da ka iingbishar Meghalaya High Court, ki bor synshar jong ka East Khasi Hills District ryngkat bad ki nongtrei jong ka Shillong Municipal Board lem bad ka jingsynran lang jong ki Ophisar na ka Meghalaya Pollution Control Board (MSPCB) ha ka sngi Baar ki la pynlong ka jingkhynra kynsan ïa ki dukan kiba dang buh ïa ki tiar plastik kiba don ha kylleng ki iew hapoh ka sor Shillong.
U Senior Environmental Engineer jong ka Meghalaya State Pollution Control Board u Bah W.R.Kharkrang ha ka jingïakren bad ki lad pathai khubor u la ïathuh ba ka jingleit khynra ka la long ha ki dukan kiba don ha ïew Laban, Last Stop bad kumjuh ruh sha iew Polo. Ha kane ka khynra, ki la ïoh kurup bun tylli ki shamoit, ki pela plastic bad ïa ki plastic ba dang pyndonkam ban die ha kine ki dukan kiba pynkheiñ ïa ka Plastic Waste Management Rules wat hadien ba ka ïingbishar ka la pyndep pynmih ïa ka hukum ban khang noh ïa ka jingdie ïa ki mar plastic kiba buh jingma ïa ka koit ka khiah jong ki paidbah.
Ka Shillong Municipal Board ka la daiñ kuna ruh ïa ki dukan kiba dang die ïa ki tiar plastic ba la mana da ka Iingbishar High Court bad na ka Central Pollution Control Board (CPCB).
La bthah ïa ki nongdie dukan ba kin buh tang ïa kiba don ïa u QR Code ba la shna da ka kompeni bad kiba la ïoh syrnot na ka Central Pollution Control Board (CPCB).
