Shillong, Nailar, 19: Ka kynhun Pulit Anti-Narcotics Task Force (ANTF) ryngkat ki Pulit ka East Jaiñtia Hills District ha ka step sngi Baar ki la ïoh kem ïa ki arngut ki nongkhaïi drok bad ïoh kurup shibun u Ganja kynthup ïa ki dawai kuli pynbuaid ba la ñiew beaiñ.
U Superintendent of Police ka East Jaiñtia Hills u Vikash Kumar, ha u kyrwoh u la pyntip ba kane ka jingïoh kurup ka long hadien ba ki Pulit ka East Jaiñtia Hills ki la ïoh jingtip na ki tnat syntiat ha ka Lah Sngi u Blei ba ki don ki briew ba la suba nongkhaii jingdih beaiñ kiba mih na Silchar, Assam ban wan sha Shillong da kawei ka bos MTC.
Ha ka jingpynap shrip hapoh u pud u sam jong ka Lumshnong Police Station ki la ïoh bat ïa kawei ka MTC Night Bus kaba don ïa u numbar ML-03-0222 bad kem noh ïa ki arngut kiba la tip kyrteng kum u Amol Nath, 42 snem rta na Silchar, Kachar, Assam bad u Radika Ranjan Das na Komalpur District, Tripura.
Hadien ba la pynlong ïa ka jingtalasi da ka jingïadon lang ki nongsakhi laitluid hapoh ka Section 50 jong ka NDPS Act, ki Pulit ki la ïoh kurup 10.35 kilo u Ganja, 2,736 tylli ki dawai kuli Tramadol Hydrocholoride, 6000 hajar tylli ki dawai kuli Nitrazapem bad 2 ki mobile phone.
Ki Pulit ki la register case ïa kine ki arngut ha Lumshnong Police Station bad ka jingtohkit ka dang ïaid shakhmat ban lapdien ïa kiwei pat kiba donkti.
