Shillong, Jylliew, 19: Ka ophis Customs North Eastern Region (NER) ha ka sngi Balang ka la ïoh ban kurup ïa ki dawai kuli Methamphetamine bad ïa u drok Heroin kiba shongdor T. 30.17 klur ha ki lai tylli ki jingkhynra bad lai ngut ki briew ba la suba ba dei ki snar khaïi drok ki la shah kem.
Ha u kyrwoh ba la phah sha ki lad pathai khubor ryngkat bad ki dur ha ka sngi Palei, ki ophisar jong ka ophis Customs Preventive, North Eastern Region kiba la ïoh jingtip kaba bniah na ki tnat syntiat, da ka jingïatreilang bad ka CPF, Silchar lem bad ki shipai BSF ki la lap ïa kawei ka kali Mahindra Bolero ba la iehnoh ha Panibhora kaba don ha surokbah kaba pynïasoh ïa ka Mizoram bad Silchar. Na kane ka kali, ki ophisar ka ophis Custom ki la ïoh kurup 79 tylli ki synduk sabon ba la thep ïa u drok uba khia 885.56 gram bad na ki 15 tylli ki synduk kiba khia 15 kilo la lap ïa ki dawai kuli methamphetamine ïa kiba la buhrieh hapoh ki Seat jong ka kali. Ka dor jong kine ki jingdih pynbuaid ba la kheiñ beaiñ ki shongdor T. 22.15 klur. Ka jingtohkit halor kane ka dang ïaid shakhmat.
Ha ka jingkhynra ha Teliamura, Agartala, da ka jingïatreilang bad ki ophisar ka CPF, Teliamura, Agartala bad ki shipai ka Assam Rifles jong ka 28 Battalion, ki la ïoh bat ïa uwei u briew uba ñiah da ka thuk thuk Bajaj 200 NS hajan Bachaibari, ha surok kaba pynïasoh ïa ka Kamalpur-Khowai ha ka por kumba 9:30 baje ha ka sngi Balang.
Da ka jingtalasi, la lap ba une u nongñiah thuk thuk u la rah saw tylli ki song kiba khia 04.00 kilo ba la thep ha ka pla kieng ïa ki dawai kuli rong pink (ba la suba ba dei ki dei ki dawai kuli (Methamphetamine). Ïa kine ki dawai kuli la suba ba la wanrah na Myanmar lyngba ka Mizoram ban pynpoi sha Agartala. Kine ki dawai kuli ki shongdor 4.02 klur bad ha kane ka jingjia ki ophisar ka Custom ïa ki la kem noh ïa une u nongñiah thuk thuk.
Katba ha ka jingkhynra ha Singerbil, Agartala, ki ophisar ka Customs jong ka Singerbil CPF, Agartala ki la ïoh kurup ïa ki dawai kuli ba la suba ba ki dei ki dawai kuli Amphetamine (Yaba) kiba khia 4 kilo ïa kiba la wanrah na Khowai ban pynpoi sha Vijaynagar da ki arngut ki briew kiba shong ha kawei ka thuk thuk Pulsar bike ka bym don ïa u registration number.
Ki ophisar ki la buddien ïa kane ka thuk thuk kumba 30 minit lyngba ka khlaw barben shwa ba kin ïoh kurup ïa kine ki jingdih pynbuaid. Ïa kine ki dawai kuli la suba ba la wanrah na ka khappud Mizoram-Tripura ban pynpoi hajan Agartala.
