Shillong, K’lyngkot, 28: Ki ophisar ka Headquarter Preventive, Customs, NER, Shillong ha ryngkat ka CPF Silchar ki la ïoh bat ïa ar tylli ki thuk thuk ar shaka ha Rangirkhari Point ha ka surok Sonai-Silchar, Assam ha ka janmiet jong ka sngi U Blei.
Kine ki thuk thuk arshaka ki dei kiba dang wan na Churachandpur, Manipur bad kiba dang ïaid sha Silchar, Assam. Ha ka jingtalasi na kine ki ar tylli ki thuk thuk ar shaka la lap hynriew tylli ki song ba tap da ka plastic ba la buhrieh. Ynda la leh test ïa ki dawai kuli kiba rong soh kiba don hapoh kine ki song da kaba pyndonkam ïa ka NDPS Field Test Kit la lap ba don Methamphetamine ha kine.
Kine ki mar beain ki don haduh 12 kilo bad ki shongdor kumba T. 12 klur. Ïa kine ki jingdih pynbuaid la kurup kynthup ïa ki thuk thuk ar shaka lem bad ïa ki ar ngut ki nongñiah hapoh ka kyndon jong ka aiñ NDPS Act, 1985. Ka jingtohkit halor kane ka dang ïaid shakhmat.
Ha ka taiew ba ladep, kum shi bynta ka Drug Destruction Drive, ka Commissionerate of Customs, NER, Shillong ka la pynjulor ïa u dok drok ba la ïoh kurup ha Shillong, Guwahati, Imphal, Dimapur bad Karimganj.
Haduh 15.90 kilo u drok Heroin, 92.776 kilo ki dawa kuli Metamphetamine, 355.40 gram u Cocaine bad 1567.161 kilo u Kynja kiba shongdor kumba T. 191.328 klur.
Ka tnat Customs ka pyntip ba baroh ki nongshong shnong ki lah ban ai jingkyrshan ïa ka jingïaleh pyrshah ïa ki kam beain kum ka jingshalan beain bad ka jingpynïaid beain ïa ka pisa lyngba ka kam khaii pateng da kaba ai jingtip ïa ka Customs. Ïa ki kyrteng jong ki nongpyntip yn nym pynpaw bad ka don ruh ka buskit ha kaba ym donkam ban siew khajna.
