Shillong, Naitung, 16: Ki bor synshar ka East Jaiñtia Hills District ha ka jingkhynra ba dang shen ki la ïoh kurup haduh 1700 kilo ki tiar plastik ba la khang ban pyndonkam hadien ba la pynmih hukum da ka Ïingbishar Meghalaya High Court.
Ka Ïingbishar Meghalaya High Court ka la khang ban die, ban pynmih bad ban lum thup ïa ki plastik ba pyndonkam tang shisien ha kylleng ka jylla baroh kawei.
Da kaba pyntreikam ïa ka jingbthah jong ka High Court, ha ka 8 tarik mynta u bnai ka kynhun ba kynthup ïa ki Executive Magistrate, ki Pujlit, bad ki nongmihkhmat na ka Meghalaya State Pollution Control Board (MSPCB) ki la pynlong ka jingkhynra ha baroh ki jakaiew kiba don hapoh ka District dang shen.
Kane ka kynhun ka la leit jurip ïa ki jaka iew kum ha Ladrymbai, Khliehriat, Sookilo bad Umpleng, ki la pyntip
“Ha ka jingkhynra, ki bor sorkar ki la ïoh kurup kumba 1705.451 kilogram ïa ki tiar plastik ba lah ban pyndonkam tang shi sien kiba duna ka jingrben kaba 120 micron,” la pyntip u Deputy Commisisoner jong ka East Jaiñtia Hills District ha u kyrwoh.
Ka jingpyndonkam ïa ki tiar plastik kiba duna ïa ka jingrben kaba 120 micron la khang ha ka ri baroh kawei naduh u snem 2022 hapoh ka Plastic Waste Management (Amendment) Rules, 2021.
Ka Sorkar Meghalaya ka la pynmih ïa ki jingpynbna bad ki jingbthah kiba pyrkhing ban dang pyndonkam ïa ki tiar plastik.
Ki bor sorkar ki la maham tyngeh ïa ki nongdie madan, ïa ki nongdie dukan ba kim dei shuh ban dang buh ne die ïa ki tiar plastik bad lada lap kin ngat ha ka jingshah pynshitom katkum ki kyndon aiñ, kin shah daiñ kuna bad nalor kata yn khang khyrdep wat ïa ka dukan.
