Shillong, ïaïong, 19: Ki Pulit kiba la ïoh jingtip ha ka sngi Baar mynta ka taiew ha ka por kumba 2:10 baje mynstep ki la ïoh kem arngut ki nongshong shnong jong ka Jebalgre, South West Garo Hills ïa kiba la tip kyrteng kum u Rambera R Marak, 25 snem bad u Kandit D. Sangma, 30 snem ka rta.
Na kine ki arngut ki Pulit ki la ïoh kurup T. 36,000 ki lut pisa thok jong ka ri India ‘Fake Indian Currency Notes’. Ha ka jingtohkit, la lap ba kine ki arngut ki la leit sha iing jong uwei u briew uba la tip kyrteng kum u Tangrik M. Marak ha ka shnong Jebalgre ha kaba ki la ïasam ïa ka pisa thok.
Hadien ka jingphla jong kitei ki arngut, ki Pulit ki leit khynra ïa ka ïing jong u Tangrik M. Marak ha kaba ki la ïoh kurup sa T. 73,000 hajar ki pisa thok.
Shwa ba ki Pulit kin poi, u Tangrik M. Marak ula phetrieh ban lait na ka jingshah kem ha ki Pulit.
Ki Pulit ki la regiter case halor kane bad ka jingtohkit ka dang ïaid sakhmat pyrshah ïa ki arngut kiba la shah kem khnang ban lap ksai naei ki ïoh ïa ki pisa thok bad ha kajuh ka por ki Pulit ki la pynlong ïa ka jingthwet kaba jur ban ïohkem ïa u Tangrik Marak.
