Shillong, Jymmang, 23: Da kaba pyntreikam ïa ki kyndon jong ka Mines and Minerals (Development and Regulation) Act, bad lyngba ka jingïoh jingtip na ki tnat syntiat halor ka jingtih be-aiñ bad lum thup ïa u dewïong ha kawei ka khlaw ha ka shnong Lum Bangla, ki Pulit jong ka East Jaiñtia Hills mar mar ki la leit ban pynlong ïa ka jingtohkit ha kaba ki lap ïa u dewïong ba la lum thup ha kane ka khlaw.
Katkum ka jingpyntip jong u Deputy Commissioner, East Jaiñtia Hills District, la ïathuh ba u dewïong u dei uba don shabar na ka jinglum jingkheiñ bad marmar la pynkynriah noh sha ka jaka lum thup dewïong jong ka Coal India.
Katkum ka jingkhein ba la ïoh na u Divisional Mining Officer (DMO) la pyntip ba u dewïong ba la tih beaiñ u don kumba 3000 hajar metric Tonne.
