Shillong, Nailur, 28: Arngut ki snar nongkhaïi drok na ka jylla Manipur ki la ngat ha ka shrip ba la pynap da ki Pulit ka West Jaiñtia Hills District ha ka miet sngi Saitjaiñ.
Ki Pulit kiba la ïoh jingtip na ki tnat syntiat ba ka don ka kynhun ba la suba na ka jylla Manipur kaba thmu ban wanrah ïa ki mar beaiñ sha ka jylla, mar mar ki la pynlong ïa ka jingtalasi ïa ki kali hajan ka Phramer Police Traffic Cell hapoh ka jingïalam jong u Addl.Superintendent of Police,West Jaiñtia Hills District u Bah Jason Mairom bad ka Anti-Narcotic Task Force ha ka jylla.
U kyrwoh ba la phah da u Superintendent of Police West Jaiñtia Hills u la pyntip ba ha ka jingtalasi ïa ki kali ki Pulit ki la ïoh bat ïa kawei ka kali TATA kaba don ïa u nombar ML05 K 2315 kaba dang wan na Khliehriat bad kaba dang thmu ban leit sha Jowai.
Ïa ka jingkhynra bad ka jingtalasi ïa ka kali bad ïa ki nongshah suba la bud pyrkhing katkum ki kyndon jong ka NDPS Act, la pyntip u SP.
Ha ka jingkhynra, ki Pulit ki la lap ba ki suba snar khaii drok ki la leh shalak da kaba thep ïa u drok ha ki 50 tylli ki synduk thep sabon da kaba buhrieh ha ka jingiuhkjat ba don shabar ka kali. Ynda la leh test la lap ba u drok Heroin u don ka jingkhia kaba 512.63 gram bad ha ka iew khaii tuh u shongdor T.2.5 klur.
Na ka met jong ki arngut ki snar khaii drok ki Pulit ki la ïoh kurup ruh T. 6,775 hajar ka pisa India, T. 3,000 hajar ka pisa jong ka ri South Korean, T. 500 ka pisa Kazakhstan, T.10 ka pisa Burma bad ar tylli ki Mobile Handset.
Ïa ki arngut ki snar khai drok ba la ithuh kyrteng kum u Chuchung Serto, uba sah ha Nakhunjang, Kangpokpi, Manipur. bad u Thanggin Towthang, uba sah ha Songpehh, Churachandpur, Manipur la kem noh da ki Pulit.
U SP u la pyntip ba ïa ka case la rejistar hapoh ki kyndon jong ka Narcotic Drugs and Psychotropic Substances (NDPS) Act bad ka jingtohkit ka dang ïaid shakhmat ban lap ksai ïa ki briew kiba donkti ban pynïaid iew ïa u drok na kawei ka jylla sha kawei ka jylla.
“Ka tnat ka ïaiban ba ka la kut jingmut ban ïada ïa ka imlang ka sahlang na ki jingdih buaid bad ka khot bad wer ïa ki nongshong shnong ba kin long kiba peitngor bad ban pyntip mardor lada lap ïa kino ki kam ba i suba sniew,” la kyntu u SP.
