Shillong, Risaw 21: Ki Pulit kiba la ïoh ïa ka jingtip kaba bniah ka 18 tarik mynta u bnai ha ka por kumba 8.15 baje mynmiet ki la ïoh bat ïa kawei ka kali Tata Sumo kaba don u nombar ML-04B-5885 ba la ñiah da u Solomon Hmar, 24 snem ka rta ha Kongong Police Check Post, East Jaiñtia Hills bad ha ka jingtalasi ïa ka kali ki la kurup 18.764 kilo u Ganja, ki mobile phone bad ka pisa na uwei uba shong hapoh ka kali uba kyrteng u Lalrem Rauta Hmar, 23 snem ka rta.
Ïa ki tiar ba la ïoh kurup la rah sha Khliehriat Police Station S bad ba la pynngat hapoh ka Section 8(c)/20(b)(ii)(b)/29 NDPS Act.
Ha ka 19 tarik mynta u bnai ha ka por 9:00 baje mynstep, katba ki Pulit ki dang talasi ïa kiba tam bilor ha Polo, Shillong, ki la ïoh bat ïa uwei u briew ba la ithuh kyrteng kum u Sunil Thapa, 29 snem ka rta bad na ka met jong u ki la kurup ïa uwei u tyndong ba la thep ïa u drok uba khia 0.07 gram, kawei ka mobile phone, kawei ka ATM Card bad ka pisa T. 3,889 hajar.
