Shillong, Nailar, 19: Ka Myntri ka tnad ka Koit ka Khiah ka Sorkar Jylla ka Dr. Ampareen Lyngdoh ka la pyntip ba ka Sorkar Jylla ka la rai ban wanrah ïa ka rukom treikam kaba lah ban weng ïa ki jingeh kiba ktah ïa ki nongtrei jong ka 108 Emergency Services ha ka jylla Meghalaya.
Ka Myntri ka la pynpaw ruh ba ka Sorkar ka dang pyrshang ban wad da ki lad ki lynti kiba pynbeit ïa ki jingeh kiba ïadei bad ka jingthmu ban aiti ïa ki kam kyrkieh sha kawei ka kompeni shimet.
Haba kylli halor ka jingdawa ba dang shen jong ki nongtrei 108 na ka bynta ban pynkiew ïa ka jingsiew T. 5,000 hajar ka Myntri ka la ong ba dang shen la kyntiew ïa ka jingsiew bad ong ruh, “wat ai ba ngan ym ïakren kumne ha ki lad pathai khubor namar ki nongtrei jong ka 108 bad nga, kaba mihkhmat ïa ka Sorkar bad u MD (ka National Health Mission) ngin ïakynduh biang lada ka kam ka dawa bad dang mynshwa ngi la ïakynduh ïa ki bad ka biang nadong shadong..”
“Kumta kane ka jingkylla kaba thymmai ai ba ngan peit hynrei nga shim ba mynta ngi don ha ka jingeh bad ka kam ba ngin buh ïa ka rukom treikam ka ban peit ïa ki kam jong ki nongtrei jong ka 108. Ngim lah shuh ban pynslem ïa kane namar ba ki don bun ki jingeh. Nga sngewnguh ïa ki nongtrei jong ka 108 kiba la trei ïa ka kam ha ka lynti kaba bha tam,” ka la pynpaw.
Da kaba pynpaw ba ka Sorkar kam don ïa ka Model bad ka NHM ka dang bat ïa ki nongtrei, ka Dr. Amparen ka la ong, “dang shen, ki katto katne ki kam la ai shabar sha kawei ka kompeni Shishupal. Ngi dang trei ban pynthikna ba ngi don ïa ka rukom treikam kaba biang.”
“Kaei kaba ka Sorkar kan leh, ngi dang ïatreilang ha ka kyrdan jong u Myntri Rangbah. Kan long kaba bakla ïa nga ban ong ïa kaei kaei kaba dang don ha ka jingbishar bniah bad jingpyrkhat,” ka la ong.
Ka la ïathuh ruh ïa ki jingeh kiba ka sorkar ka la mad ha kaba ïadei bad ka jingpynbiang ïa ki kali Ambulance na ka daw ka jingbym don ka kompeni kaba peit bad kaba sumar ïa ki.
Ka la kular ba ka Sorkar kan wanrah ïa ka mat treikam kaba kyntiew ïa ka jingdon jong ki kali Ambulance bad ban pynthikna ïa ka jingeh jong ki nongtrei.
Ha kaba ïadei bad ka jingpynslem ban aiti ïa ka jingshakri jong ka 108 sha ka kompeni shimet, ka Myntri ka la pynpaw ba ka mat ka ïaid shabar jong ka jingai Tender bad mynta ka dei ka kam ban wad ïa ka rukom pynbeit ïa ki jingïakynad.
Ka Myntri ka la kular ba ka Sorkar ka la kut jingmut ban pynthikna ba ki nongtrei 108 ki shah kynthup hapoh ka Insurance bad kiwei kiwei ki jingmyntoi ba la ai katkum ka kam ba ki trei.
Ka la pynpaw ïa ka jingsngewnguh ïa ka kam kaba bha jong ki nongtrei bad ka la ban jur ba ki dei ka bor treikam kaba kongsan. Ka Myntri ka la pynpaw ba ynda la dep pynkhreh ïa ka plan, yn sa sam sha baroh khamtam eh ïa ki nongtrei ka 108.
