Shillong, Jymmang, 10: U Lat ka jylla Meghalaya C. H Vijayashankar ha ka sngi Saitjaiñ u la khot ïa ka jingïalang kaba kyrpang ha Raj Bhavan ïa ki nongïalam niam bad ki jaidbynriew bapher bapher ban pynpaw ïa ka jingïatylli hapoh ka sienjam ‘Operation Sindoor ‘jong ka ri India.
U Lat u la kyntu ïa ki dkhot jong baroh ki niam ha ka jylla ba kin ïatrei lang ha ka jingïatylli bad ka jingkyrshan ïa ka ri.
Ha kane ka jingïalang kaba la pynlong ha Raj Bhavan, Shillong, la sakhi ïa ka jingïashim bynta na ki nongmihkhmat jong ki katto katne ki niam ba kynthup ïa u Nabha Bhattacharya – Vice President ka Meghalaya All Faiths Forum bad u President ka Central Puja Committee, Shillong, u Ellizer N Sangma – Pastor ka Garo Baptist Church, Rev GPL Gadew – Presbyterian Church, Shillong, Ganesh Dkhar – dkhot ka Seng Khasi, Sayidullah Nongrum – President ka Meghalaya Muslim Forum, Dr. Shngain Pyrbot – General Secretary, Seinraij, Shillong, Father Staibok Warjri na ka Balang Catholic uba la wan mihkhmat ha ka kyrteng jong u Archbishop Victor Lyngdoh ki nongmihkhmat na ka balang Presbyterian ha ka thain Khasi Jaintia Hills, ka Garo Baptist Church, Ramakrishna Mission, bad ka Archdiocese jong ka Shillong.
Ha kane ka jingïalang la wan ïashim bynta ruh da u Myntri Rangbah ka Jylla u Conrad K. Sangma ha ryngkat u Symbud Myntri Rangbah ka Jylla uba la ïashim bynta lyngba ki lad digital namar ki dang don ha nongbah Delhi.
Haba kren sha ki nongïalam niam bad ki nongïalam ha ka imlang sahlang kiba la ïawan ïashim bynta, u Lat u la pynpaw ïa ka jingsngewnguh kaba khraw ïa ka jingwan jong ki ha kum kane ka jingkhot kaba kyrkieh. U la pynrem jur ïa ki kam lehnoh, ha ri India bad ha ka pyrthei baroh kawei, bad u la ïaroh ïa ki nongïalam na ka bynta ka jingkyrshan lang jong ki ïa ka ri. Ha kine ki por kiba jynjar, u Lat u la ïaroh ïa ka bynta kaba kongsan kaba ki nongïalam niam bad ki nongmihkhmat jong ka imlang sahlang ki shim ha kaba kyntiew ïa ka jingïatylli ha ka imlang sahlang bad ban pynneh ïa ka jingsuk. U la kyrpad ïa uwei pa uwei u nongshong shnong, khlem da khein ïa ka niam ne ka deiriti, ban ieng tylli ha kaba pynneh ïa ki nongrim jong ka jingburom markylliang, ka jingieit ri, bad ka jinglong trai ri.
U Lat u la pynthikna ba la shim ïa baroh ki lad ki lynti ban pynneh pynsah ïa ka suk ka sain ha Meghalaya bad u la pynpaw biang ba ka bor jong ka India ka don ha ka jingïar jong ka bad ka jingngeit ha ka synshar paidbah, bad ba dei ban pynthikna ba ka jingïasuk ka long kaba kongsan tam. Ha kine ki por jong ka jingjynjar, ka long kaba kongsan ïa baroh ki jaitbynriew ban ïatrei lang, ban pynskhem biang ïa ka jingngeit ha kajuh ka thong, bad ban ïatreilang ban pynthikna ba ka imlang sahlang kaba ïar jong ngi kan dang neh bad kan dang khlain shuh shuh.
U myntri sorkar ba dei peit ïa ka tnad pule puthi, Rakkam A. Sangma u la ong ba ka ri ka dei jong baroh ki nong India bad da ka jingkyrshan jong ki paidbah, ka sorkar kan poi sha ka thong. U la kyntu ïa ki nongïashim bynta ha kane ka jingïalang ban duwai na ka bynta ki kynhun ïada ri. U A.T. Mondal, Myntri ka tnad bording u la ong ba ym don jaka ha kane ka ri ïa ki kam lehnoh.
Ha ka jingai jingkren jong u, u Chief Secretary ka Meghalaya Bah Donald Wahlang u la ban jur halor ka jingdonkam ïa ka jingïatylli ha ka ri da kaba ong, “Ka dei ka ri kaba kongsan tam.” U la pynsngew ruh ïa ka jingsngewnguh jong ka sorkar ïa u Lat ka jylla bad ïa baroh kiba la ïa wan ïashim bynta ha kane ka jingïalang.
Baroh ki nongïashim bynta bad ki heh sorkar ki la pynrem lang ïa ka jingshah thombor ha Pahalgam bad ki ai ka jingkyrshan kaba khlem artatien ïa ki shipai jong ka ri na ka bynta ka jingpynphai kaba stet bad kaba thikna jong ki shipai India dang shen hapoh ka ‘Operation Sindoor’ ha kaba la ther ïa ki jingdon jingem jong ki lehnoh sha palat u pud u sam jong ka ri, kaba la ai ka jubab kaba khlain pyrshah ïa kito kiba buh jingma ïa ka shongsuk shongsain ha ri India.
Ki nongïalam niam, da ka jingïatylli, ki la kular ban ai ka jingkyrshan ïa ka sorkar pdeng bad pynpaw ïa ka jingkyrmen ba ka shongsuk shongsain kan wan ha baroh kawei ka thain. Baroh ki dkhot ryngkat bad ki heh sorkar bad u Lat ki la pynpaw ïa ka jingsngewlem ïa kito kiba la duh ïa la ka jingim ha kane ka jingshah thombor da kaba sngap jar ar minit.
