Shillong, Naiwieng 05: Ka jingkilan met hapdeng ki shipai India bad ka ri Malaysia ban wanrah ïa ka jingïadei kaba khlaiñ hapdeng ki bor shipai jong kine ki ar tylli ki ri bad ban pynkhlaiñ ïa ka jingpahara ong ki bor shipai ka la poi noh sha kaba kut ha ka sngi Saitjaiñ, ïa kaba la pynlong ha Umroi, Ribhoi District.
Ha ka jingpynkut ïa kane ka jingkilan met, u Brig. Mayank Vaid u la ong nalor kaba plie lad ban pyni ïa ka bor jong ki shipai India, kane ka jingkilan met kan wanrah ruh ïa ka jingïadei kaba jan hapdeng ki shipai jong ka ri India bad ka ri Malaysia.
“Ka jingkilan met kan nang pynïar shuh shuh ïa ka jingïadei hapdeng ki shipai jong ka ri India bad ka ri Malaysia, bad kan tehsong ruh ïa ka jingïadei hapdeng kine ki ar tylli ki ri,” la bynrap u Vaid.
Kane ka jingkilan met ka la sdang naduh ka 23 tarik Risaw, hapdeng ki shipai ka ri India na ka Rajput Regiment bad ka 5th Royal Battalion jong ka kynhun shipai ka ri Malaysia. Haduh 120 ngut ki shipai jong kine ki ar tylli ki ri ki la ïashim bynta ha kane ka jingkilan met kaba la neh haduh ar taiew kynthih.
Ha ka jingïakilan met, ki shipai ki la ïashim bynta ha ka jingtur thma sha khlaw, ha ki bynta khap sor bad ha ki jaka sor. Ki shipai ki la pynlong ruh ka jingïaid pahara ha ka por mynmiet ha ka khlaw barben. Ki shipai ka ri Malaysia ki la pyni ruh ïa ki buit kumno ban pyllait im ïalade ha khlaw.
“Ka jingïashim bynta ha ka jingkilanmet bad ban sngewthuh ïa ka rukom tur thma jong ki shipai ha ki jaka khlaw ka long kaba jop. Kumjuh ruh, ka jingpyni ïa ki buit ïakhun ha madan ka la nang pynmyntoi shuh shuh ïa ki shipai,” la ong u Commanding Officer u K.K Bajpai. U la bynrap ba ha kane ka jingkilan met la buh thong halor ka jingkhlaiñ ka bormet, ki buit ïakhun bad ka jingïasam jingtip mar kylliang ha ka jingleit tur thma sha ki khlaw ki btap.
Ïa kane ka jingkilan met kaba la neh ar taiew kynthih la pynlong ha ki lai bynta, ka jingïasam buit kaba neh lai sngi kynthih, ki phra sngi ki jingkilan met ha madan bad ka jingpyni ïa ki sap ïakhun kaba la neh haduh 48 kynta ha kaba ki heh ophisar shipai jong kine ki ar tylli ki kynhun shipai ki la ai jingkren.
Ha ka jingpynkut, la pyni nam ruh ïa ki tiar siat bad ki tiar ïaleh ba la pyndonkam da kine ki ar tylli ki kynhun shipai bad ha kajuh ka por la pyni ruh ïa ka nuksa kumno ban ïakhun thma ïa ki riewkieng atiar.
