Shillong, Nailur, 14: Ka Meghalaya Tourism Development Forum (MTDF) ka la khot ïa ka jingïakren pynbeit halor ka jingthmu ban pyrkhing ïa ki jngohkai pyrthei ha ka jylla, da kaba pynpaw ïa ka jingsngewkhia halor ka rai ba dang shen jong ka All Khasi Meghalaya Tourist Taxi Association (AKMTTA) ban khang ïa ki kali Tourist kiba wan nabar ban rung sha ki jngohkai pyrthei kiba don ha ka jylla
“Ka MTDF ka ngeit ba kum kine ki jingpyrkhing ki lah ban khanglad ïa ka jingroi jong ki kam jngohkai pyrthei ha Meghalaya. Ka Forum ka la kynthoh ba kino kino ki jingpyrkhing ïa ka leit ka wan jong ki nongjngohkai pyrthei ka lah ban pynduh mynsiem ïa kiba bun ki nongwan jngohkai ban wan jngohkai sha kane ka jylla,” ong u Chairman jong ka MTDF u Bah Larsing Sawian ha ka shithi ba la phah sha ka AKMTTA.
“Da kaba burom, ngi pynpaw ba kum kine ki sienjam ki buh ïa ka nuksa kaba lah ban khanglad khlem da sngewthuh ïa ka jingroi jong ka kam jngohkai pyrthei ha ka Jylla jong ngi. Ki nongjngohkai pyrthei ki wan jngoh ïa ka Meghalaya ym tang namar ka jingitynnad jong ka, hynrei na ka bynta ka jingsngewtynnad bym don jingshah teh. Kano kano ka jingpyrkhing kan pynlong ïa ki nongjngohkai pyrthei ban kiar na kaba wan sha ka jylla bad kan ktah wat ïa ka lawei jong ka kam jngohkai pyrthei ha Meghalaya,” ong u Bah Larsing.
Ka MTDF ka pynksan ba ka kam jngohkai pyrthei ka dei ka kam kaba don bun ki kynhun bad ba ki rai halor ki polisi ne ki kyndon jong ka kam jngohkai pyrthei ki dei ban long kiba kynthup lang, ryngkat bad ki jingai jingmut na baroh ki kynhun.
Ka Forum ka la kyntu ïa ka Taxi Association ban kiar na ki kam ban shim rai hi marwei hynrei ban ïatreilang kawei na ka bynta ka jingkiew ka iew jngohkai pyrthei bad ban tei ïa ka rukom kaba lah ban neh kaba ai jingmyntoi ïa baroh.
“Ka MTDF ka la don ka bynta kaba khraw ha kaba kyntiew ïa ka jylla Meghalaya ha ki kam jaka jngohkai pyrthei ha ka por ba ka kam jngohkai pyrthei ka dang sdang. Mynta hadien palat 20 snem ba la seng ïa ka, ngi ngeit skhem ba ka jngohkai pyrthei ha Meghalaya ka don ïa ka lawei kaba phyrnai hakhmat jong ngi. Ngi don ruh ka jingmut ba lada ka Meghalaya ka don ïa ka kad liengsuiñ kaba treikam ha baroh ki aiom bad ka High Speed Railway Line, ka kam jngohkai pyrthei kan ym kiew tang ha ki lum Khasi bad Jaiñtia hynrei kan ai jingmyntoi shibun ruh ïa ki Local Tourist Taxi Operator namarba ka jingrung bad jingmih jong ki briew shapoh ka jylla kan long kham bunsien lyngba ka kad liengsuiñ bad ka lynti rel hapoh ka ri Khasi. Kane kan ai ïa ki nongniah kali kamai Tourist jong ngi ïa ka bor ba pura ban pynbiang ïa ki jingdonkam jong ki nongwan jngohkai sha ka jylla,” la ong u kyrwoh bad bynrap, “ka kam jngohkai pyrthei, da ka jinglong jong ka, ka dei ka kam kaba don bun ki kynhun. Lait na ki nongpynïaid kali, ka kynthup ïa ki trai jong ki hotel, ki jaka jngohkai, ki iing basa bad ki iingsah, ki jaka bam, ki Café, ki nongkdew lynti bad ki kam rit kam ria ki bym lah ban khein. Kawei pa kawei na kine ki bynta ka don ka bynta kaba mar katjuh ha kaba kumno yn pynwan dur bad pynïaid ïa ka kam jngohkai pyrthei ha Meghalaya. Kumta, ki jingïakren bad ki rai halor ki polisi ne ki kyndon jong ka kam jngohkai pyrthei ki dei ban long kiba kynthup lang, ryngkat bad ki jingai jingmut na baroh ki kynhun,” la ong u Bah Sawian.
“Da kaba burom ngi kyntu ba dei ban kiar na ki kam kum ki jingïakhih, ki jingkhanglad, lane ki kyndon ba noh shiliang, namar ki lah ban pynthut ïa ka jingkiew kaba ïatylli kaba ma ngi baroh ngi angnud. Ha ka jaka kata, ka lad ka shong ha kaba pynroi lang ïa ka ïew jngohkai pyrthei bad ban tei ïa ka Meghalaya kum ka jaka ba ym don “ka aiom ba lait.” la ong u Bah Sawian.
“Dei namar ka jinghiar jong ki nongwan jngohkai ha ka por bym dei ki aiom ba ki trai jong ki Torist Taxi bad ki nongpynïaid ïa ki Hotel bad ki iingbasa ki ïakynduh ïa ki jingeh kiba khraw,” u la ong bad bynrap, “da kaba ïatreilang ban pynbha ïa ki lad kamai, ki jaka sah, ka bam ka dih bad ki jingïohi ïa ka kolshor, ngi lah ban thaw ïa ka rukom jngohkai pyrthei kaba lah ban pynlong ïa ngi ba ngin ym ïakynduh jingeh lada duna ka jingwan ki nongjngohkai pyrthei ha ki aiom ki bym dei.”
