Shillong, Nailar 09 : Ka Hynniewtrep Achik National Movement ka la dawa ia ka Khasi Hills Autonomous District Council ba kan thaw noh da ka ain kaba pyrkhing ia ki thei khasi kiba ioh tnga da ki briew kiba nabar ka jylla.
Ka seng hapoh ka jingialam jong u President u Bah Lamphrangsngi Kharbani ha kane ka sngi, ka la pynkup burom ruh ia u Chief Executive Member jong ka Khasi Hills Autonomous District Council u Bah Pyniaid Sing Syiem halor ka jingshimti jong u ia kane ka shuki kum u khliehduh jong ka Council.
Ha ka jingiakren bad ki lad pathai khubor ha ka 9 tarik u Nailar, 2023 u Bah Lamphrang u la iathuh ba ka seng ka la pynsngew ruh ha u Chief Executive Member ia ki mat ki bapher bapher kiba ktah ia ka ri bad ka jaidbynriew bad ha kajuh ka por u la iathuh ba ka seng ka la kyrpad ia ka District Council ba kan bthah ia ki Hima, ki Raid bad ki Shnong ba kin pynmih da ki adong kiba khanglad ia ki thei khasi ban iashongkha khleh bad kiwei pat ki jaidbynriew kiba dei nabar jong ka jylla namarba kane ka ktah ia ka khaii ka pateng bad ka ioh kam ka iohjam jong ki trai ri trai muluk.
