Shillong, Naitung, 17: Ka Kur Syiemlieh ka la kyrpad ïa ki bor ba dei peit jong ka Sorkar ban thoh pura noh ïa ka kyrteng jong u Tirot Sing kum u Tirot Sing Syiemlieh.
Ka Kur Syiemlieh ka la pynpaw ïa kane ka jingkyrpad ha ka lyngkhuh sngi ïap kaba 189 snem jong u Syiem Tirot Sing ba la rakhe ha ka jylla baroh kawei ban kynmaw burom ïa ka jinglen lade bad ka jingpha jong u Syiem Tirot Sing ïa la ka jong ka jingim da kaba ïakhun da ka thma pyrshah ïa ki shipai ka Sorkar Bilat.
Ha kane ka sngi, ki nongïalam jong ka Seng Kur Syiemlieh ki la leit buh syntiew ha u durmot ba shi ryngieng jong u Syiem Tirot Sing ba la tei ha phyllaw jong ka State Central Library, Shillong.
U President jong ka Seng Kur Syiemlieh Seng Kmie u Bah Snarwel Syiemlieh ha ka jingïakren bad ki lad pathai khubor u la ong, kum ka kur ka sngew burom ïa ki kam bakhraw kiba u Syiem Tirot Sing u la leh ha ki snem ba la leit noh.
U Prof. David Syiemlieh uba dei ruh u Chairman barim jong ka UPSC u la ong, “mynta u snem ha u Rymphang haba nga leit ban ïashim bynta ha ka jingïalang ha Dhaka ba la plie paidbah ïa u durmot jong u Tirot Sing nga sngewkmen haduh katta katta ban ïoh mihkhmat na ka liang ka Kur bad na ka bynta ki paidbah ka Meghalaya.”
U la kyrpad ruh ïa ka Sorkar ban thoh pynthymmai biang ïa ki kyntien ba la thoh ha u mot tei sahnam ïa u Tirot Sing ha State Central Library namarba ki dak ki la sdang ban khuid bad kumjuh ruh ban shna pynitynnat ïa kane ka jaka ba la pynieng lang ruh ïa ki durmot jong ki khlawait ka jylla, kata, u Kiang Nangbah bad u Pa Togan Sangma.
“Nga kyrpad ïa ka Sorkar bad ïa ka Kur Syiemlieh ban shim ïa ki lad ki lynti ban pynitynnat ïa kane ka jaka shwa ba ki kynrem ki lyndan bad ki briew kiba nabar kin wan jngoh ïa ka jaka tei nam.
Haba bynrap halor kane, ka Kong Lata Syiemlieh ka la ong, “bun na ki stashu ba la tei sah kynmaw ïa u Syiem Tirot Sing la pynjah noh ïa ka jait bapura jong u Mama tymmen jong ngi bad nga ngeit ba kane kan poi sha ki tyndong skhor jong kiba dei ban leh namarba ka kyrteng ba shisha ka dei Tirot Sing Syiemlieh.”
“Ngi angnud ïa kata bad ha ki sngi ki ban sa wan ngin ïohi ïa ka jingpynkylla khnang ba kan ym sah tang shiteng ka kyrteng bad ka jait jong u Mama jong ngi,” la ong ka Kong Lata.
“Ngi sngewnguh ruh ïa ka Sorkar kaba la pynbna shuti ïa kane ka sngi ban kynmaw ieid bad burom ïa ka jingshah shitom jong u Tirot Sing Syiemlieh.
